O Zinâ

Ediçion

E notiçie da-a Liguria

Senti a verscion registrâ:

Ponte Morandi, à çinque anni da-o desastro Zena a l’arregòrda e 43 vittime

À çinque anni da-o desastro Zena a s’é affermâ pe regordâ o deruo do ponte Morandi, i 14 d’agosto do 2018, costou a vitta à 43 persoñe. A commemoraçion a s’é tegnua into Ciassâ da Memöia co-o ministro de Infrastruttue Matteo Salvini à representâ o Governo. À 11.36, l’oa do squascio, o menuto de scilençio marcou da-o son de campañe de gexe e da-e scireñe de nave in pòrto. «L’anno che vëgne spero de portâ unna neuva lezze ch’a fasse pæge e vittime do desandio e quelle do terroriximo», o l’à promisso o Salvini. «E infrastruttue no son ancon segue, i nòstri mòrti no son servii à ninte», a l’à denonçiou a Egle Possetti, prescidente do comitato de famigge de vittime. O proçesso pe 58 accaxonæ o va avanti, a-i 11 de settembre se repiggia à louâ. Inte un anno l’é stæto sentio 170 testimònni inte 84 udiense. O Francesco Pisani, inzegnê ch’o l’aiva travaggiou co-o Morandi, o no l’à fæto à tempo à depoñe perché o l’é mòrto a-i 17 d’agosto. Pe-a primma sentensa se parla do 2024 e se vedde za o fantaxima de primme prescriçioin.

Traduçion italiaña

Ponte Morandi, a cinque anni dal disastro Genova ricorda le 43 vittime

A cinque anni dal disastro Genova si è fermata per ricordare il crollo del ponte Morandi, il 14 agosto 2018, costato la vita a 43 persone. La commemorazione si è tenuta nella Radura della Memoria col ministro delle Infrastrutture Matteo Salvini in rappresentanza del Governo. Alle 11.36, l’ora del collasso, il minuto di silenzio scandito dal suono delle campane delle chiese e dalle sirene delle navi in porto. «L’anno prossimo spero di portare una nuova legge che equipari le vittime dell’incuria a quelle del terrorismo», ha promesso Salvini. «Le infrastrutture non sono ancora sicure, i nostri morti non sono serviti a niente», ha denunciato Egle Possetti, presidente del comitato dei familiari delle vittime. Il processo per 58 imputati prosegue, l’11 settembre riprenderanno i lavori. In un anno sono stati sentiti 170 testimoni in 84 udienze. Francesco Pisani, ingegnere che aveva lavorato con Morandi, non ha fatto in tempo a deporre perché è morto il 17 agosto. Per la prima sentenza si parla del 2024 e si vede già lo spettro delle prime prescrizioni.

Unna proçescion contra a seçia, in Liguria se repiggia l’antiga tradiçion

No ceuve da tròppo tempo into Ponente da Liguria e coscì no resta che pregâ. Anche st’anno à Impëia o pareco de San Zane, Alessandro Ferrua, o l’à inandiou unna proçescion de penitensa a-i 22 d’agosto, con partensa da-a baxilica à 7.30 da mattin, dapeu ghe saià a messa in gexa. «Noiatri preghemmo, se o Segnô o vorrià ciuvià. À tutte e mainee ô domandemmo», o l’à dito o præve. A l’é unna tradiçion crestiaña antiga quella de rogaçioin che se favan pe pregâ unna boña arrecuggeita dòppo avei semenou. A seçia a l’é sempre ciù critica into Ponente: ben ben di Commun da provinsa an za commandou o raçionamento de l’ægua de neutte, e tanta a l’é quella ch’a va straggiâ pe-i guasti di conduti.

Traduçion italiaña

Una processione contro la siccità, in Liguria si recupera l’antica tradizione

Non piove da troppo tempo nel Ponente della Liguria e così non resta che pregare. Anche quest’anno a Imperia il parroco di San Giovanni, Alessandro Ferrua, ha organizzato una processione di penitenza il 22 agosto, con partenza dalla basilica alle 7.30, poi ci sarà la messa in chiesa. «Noi preghiamo, se il Signore vorrà pioverà. In ogni caso lo chiediamo», ha detto il sacerdote. È una tradizione cristiana antica quella delle rogazioni che si facevano per auspicare un buon raccolto dopo aver seminato. La siccità è sempre più critica nel Ponente: diversi Comuni della provincia hanno già ordinato il razionamento dell’acqua di notte, e molta è quella che viene sprecata per i guasti alle condutture.

Addio a-a Renata Scotto, voxe d’òpera ch’a l’à incantou o mondo

A l’é mòrta d’89 anni a Renata Scotto, cantante d’òpera avvoxâ inte tutto o mondo. A se n’é anæta inta seu Saña, donde a l’ea nasciua do 1934 e donde a l’aiva debuttou do '52 in sciô parco do tiatro Ciabrea con La Traviata. Inta seu longa carrea da soprano a l’à cantou a-a Scala de Milan, a-o Metropolitan de Neuva York e a-a Royal Opera House de Londra e a l’à guägno unna nòmina internaçionale. A l’aiva piggiou o pòsto da Maria Callas inta produçion de La sonnambula à Edimburgo do '57. Inta çittæ da Torretta a l’ea tornâ che l’é trei anni comme regista. O morteuio a-i 19 d’agosto in forma pubrica into dòmmo de Saña. O Commun o l’à deçiso d’espoñe e bandee à mez’asta in segno de desmuo.

Traduçion italiaña

Addio a Renata Scotto, voce d’opera che ha incantato il mondo

È morta a 89 anni Renata Scotto, cantante d’opera nota in tutto il mondo. Se n’è andata nella sua Savona, dove era nata nel 1934 e dove aveva debuttato nel '52 sul palco del teatro Chiabrera con La Traviata. Nella sua lunga carriera da soprano ha cantato alla Scala di Milano, al Metropolitan di New York e alla Royal Opera House di Londra e ha conquistato una fama internazionale. Aveva sostituito Maria Callas nella produzione de La Sonnambula a Edimburgo nel '57. Nella città della Torretta era tornata tre anni fa come regista. I funerali il 19 agosto in forma pubblica nel duomo di Savona. Il Comune ha deciso di esporre le bandiere a mezz’asta in segno di lutto.

E notiçie da l’Italia

Senti a verscion registrâ:

Monta o prexo da benziña, polemica in sciô Governo

Polemiche infinie in sciô prexo da benziña in Italia che inte un caxo o l’é arrivou à passâ i 2,70 euro in autostradda. Segondo o Codacons, graçie a-i viægi de stæ o Stato o l’incascieiva ciù che 2,27 miliardi da-e tasce in scî carburanti. L’assoçiaçion a veu fâ unna denonçia contra o ministëio pe speculaçion a-i danni di consummatoî. L’effetto o se sentià in sciâ speisa ascì, dæto che l’88% da merçe a l’arriva in scê stradde. Tanti i dubbi in sciâ reisa di neuvi cartelli con l’indicaçion do prexo medio impòsti da-o Governo. «No l’é vea che i prexi son feua de contròllo», o l’à dito o ministro Urso, ch’o l’à dæto a corpa da montâ à l’Opec, l’organizzaçion di Paixi arabi amixi da Ruscia, e o l’à levou da mezo l’ipòtexi de un taggio de tasce particolæ.

Traduçion italiaña

Sale il prezzo della benzina, polemica sul Governo

Polemiche infinite sul prezzo della benzina in Italia che in un caso è arrivato a superare i 2,70 euro in autostrada. Secondo il Codacons, grazie ai viaggi estivi lo Stato incasserebbe più di 2,27 miliardi dalle tasse sui carburanti. L’associazione vuole fare una denuncia contro il ministero per speculazione ai danni dei consumatori. L’effetto si sentirà anche sulla spesa, dato che l’88% della merce arriva sulle strade. Tanti i dubbi sull’efficacia dei nuovi cartelli con l’indicazione del prezzo medio imposti dal Governo. «Non è vero che i prezzi sono fuori controllo», ha detto il ministro Urso, che ha dato la colpa degli aumenti all’Opec, l’organizzazione dei Paesi arabi alleati della Russia, e ha escluso l’ipotesi di un taglio delle accise.

Dònna ammassâ da-o compagno passou in Campania, assascinio doggio in Piemonte

Unna dònna de 56 anni, Anna Scala, a l’é stæta ammassâ à cotellæ da-o compagno passou à Piano di Sorrento a-i 17 d’agosto. À trovâla inte unna possa de sangue l’é stæto di passanti ch’an sentio di sbraggi d’inte un parchezzo: a vittima a l’ea into portabagaggi de unna machina. L’òmmo, o Salvatore Ferraiuolo de 54 anni, o l’é stæto acciappou da-i carabinê in scî bricchi: accaxonou d’assascinio premeditou, in sciâ fin o l’à confessou. A Scala, ch’a louava comme perrucchea à cà de casañe, a l’aiva za denonçiou pe stalking inti urtimi meixi. E in provinsa de Conio un zoeno olandeise de 21 anni con di problemi pscichiatrichi inte unna rattella o l’à ammassou con un cotello seu poæ e un amigo de famiggia ch’o î ospitava, dapeu o l’é scappou inti bòschi. I carabinê l’an attrovou no guæi lontan dòppo doî giorni e l’an arrestou.

Traduçion italiaña

Donna uccisa dall’ex compagno in Campania, duplice omicidio in Piemonte

Una donna di 56 anni, Anna Scala, è stata uccisa a coltellate dall’ex compagno a Piano di Sorrento il 17 agosto. A trovarla in una pozza di sangue sono stati alcuni passanti che hanno sentito urla da un parcheggio: la vittima era nel bagagliaio di un’auto. L’uomo, Salvatore Ferraiuolo di 54 anni, è stato rintracciato dai carabinieri sulle alture: accusato di omicidio premeditato, alla fine ha confessato. Scala, che lavorava come parrucchiera a domicilio, lo aveva già denunciato per stalking negli ultimi mesi. E in provincia di Cuneo un giovane olandese di 21 anni con problemi psichiatrici durante una lite ha ucciso con un coltello suo padre e un amico di famiglia che li ospitava, quindi è scappato nei boschi. I carabinieri lo hanno trovato non molto lontano dopo due giorni e lo hanno arrestato.

O Roberto Mancini o lascia a naçionale italiaña de ballon

Un scrollon into mondo do ballon: l’allenatô da naçionale italiaña Roberto Mancini o l’à dæto e dimiscion a-a cheita a-i 13 d’agosto, à pöchi giorni da-i impegni pe-e qualificaçioin a-i Europëi do 2024. E raxoin, comm’o l’à dito inte interviste ch’o l’à accordou a-i giornali, saieivan da çercâ inta mancansa de confiansa e inta differensa de vixoin co-o Gravina, o prescidente da Figc. L’elezzuo pe assettâse in sciâ banca di azzurri o l’é o Luciano Spalletti, fresco de scudetto co-o Napoli, che into contræto o l’aiva impòsto o prexo de 3 mioin comme condiçion pe liberâlo in antiçipo. Pe-o Mancini se parla de un avvegnî co-a naçionale de l’Arabia Saudita, ma primma o dovià desligâse da-a Figc s’o no vorrià intrâ inte unna conteisa legale.

Traduçion italiaña

Roberto Mancini lascia la nazionale italiana di calcio

Terremoto nel mondo del calcio: l’allenatore della nazionale italiana Roberto Mancini ha rassegnato improvvisamente le dimissioni il 13 agosto, a pochi giorni dagli impegni per le qualificazioni agli Europei del 2024. Le motivazioni, come ha detto nelle interviste che ha rilasciato ai giornali, sarebbero da cercare nella mancanza di fiducia e nella differenza di vedute con Gravina, il presidente della Figc. Il prescelto per sedersi sulla panchina degli azzurri è Luciano Spalletti, fresco di scudetto col Napoli, che nel contratto aveva imposto il prezzo di 3 milioni come condizione per liberarlo in anticipo. Per Mancini si parla di un futuro con la nazionale dell’Arabia Saudita, ma prima dovrà svincolarsi dalla Figc se non vorrà entrare in un contenzioso legale.

E notiçie da-o mondo

Senti a verscion registrâ:

Crixi di inmòbili in Ciña, fallio o colòsso China Evergrande

O China Evergrande, o colòsso cineise di inmòbili con più poffi a-o mondo, o l’à deciarou a bancarotta e o l’à presentou a domanda de fallimento inte un tribunâ de Manhattan con ciammâ a proteçion da-i creditoî. A notiçia a l’arriva into mezo de unna gròssa crixi do settô into Paise do Levante, co-a poia che i problemi pòssan allargâse a-o resto de l’economia tanto che o Pil o cresce ciù adaxo à peto de previxoin do 5%. Da-o 2021 l’é za fallio o 40% de soçietæ cineixi che vendan di inmòbili. E à luggio, pe-a primma vòtta do 2023, se registra un rebasso di prexi de neuve cæ. O reisego o l’é quello de un effetto a cadeña à livello globale.

Traduçion italiaña

Crisi immobiliare in Cina, fallito il colosso China Evergrande

China Evergrande, il colosso immobiliare cinese più indebitato al mondo, ha dichiarato la bancarotta e ha presentato istanza di fallimento in un tribunale di Manhattan invocando la protezione dai creditori. La notizia arriva nel mezzo di una grossa crisi del settore nel Paese orientale, col timore che i problemi possano allargarsi al resto dell’economia mentre il Pil cresce più lentamente rispetto alle previsioni del 5%. Dal 2021 è già fallito il 40% delle società cinesi che vendono immobili. E a luglio, per la prima volta nel 2023, si registra un calo dei prezzi delle nuove case. Il rischio è quello di un effetto a catena a livello globale.

Guæra in Ucraina, droin contra Mosca. Ma pe-i Stati Unii a controffensciva a fallià

Va avanti a controffensciva de l’Ucraina in Ruscia, con di neuvi droin abbattui di quæ un à soli 5 chillòmetri da-o Cremlin. Ma segondo i serviçi segretti americhen a no saià assæ pe arrivâ à l’obiettivo de taggiâ o collegamento pe tæra co-a Crimea. Da Kiev l’é vegnuo feua a revendicaçion de l’attacco a-o ponte de Kerch, fæto sätâ pe l’äia con di droin. O prescidente da Bieloruscia Aleksandr Lukashenko o ciamma a paxe: «A guæra – o l’à dito – a se peu affermâ oua». Intanto l’India a no l’à invitou l’Ucraina a-o G20: «E relaçioin son boñe, ma a seguessa a no tocca à noiatri», o l’à commentou o ministro de l’Estranxeo Jaishankar.

Traduçion italiaña

Guerra in Ucraina, droni contro Mosca. Ma per gli Stati Uniti la controffensiva fallirà

Continua la controffensiva dell’Ucraina in Russia, con nuovi droni abbattuti di cui uno a soli 5 chilometri dal Cremlino. Ma secondo i servizi segreti americani non sarà abbastanza per raggiungere l’obiettivo di tagliare il collegamento via terra con la Crimea. Da Kiev è emersa la rivendicazione dell’attacco al ponte di Kerch, fatto saltare in aria con droni. Il presidente della Bielorussia Aleksander Lukashenko invoca la pace: «La guerra – ha detto – si può fermare ora». Intanto l’India non ha invitato l’Ucraina al G20: «Le relazioni sono buone, ma la sicurezza non spetta o noi», ha commentato il ministro degli Esteri Jaishankar.

Inçendi, emergensa a-e Canäie e in Canada: miggiæa de persoñe scorrie d’in cà

No s’afferma l’emergensa pe-i inçendi in gio pe-o mondo. À Tenerife, uña de isoe Canäie, o feugo o l’à mangiou 3mia ettari de bòsco: 8mia persoñe son stæte scorrie d’in cà ò an reçevuo o commando de no sciortîne. «O l’é o ciù grave di urtimi 40 anni», o l’à dito o governatô Fernando Clavijo. Scituaçion feua de contròllo anche in Canada, donde unna çittæ intrega de 20mia abitanti, Yellowknife, a l’é stæta desbarrassâ avanti che e sciamme arrivessan à toccâ a periferia. A-e Hawaii, donde se conta 100 mòrti e passa pe-i inçendi, l’à dæto e dimiscioin o Herman Andaya, o cappo de l’Agençia pe-a gestion de emergense de Maui, criticâ pe no avei sunnou l’allarme tanto che o feugo o devastava a çittæ de Lahaina.

Traduçion italiaña

Incendi, emergenze per le Canarie e in Canada: migliaia di persone sfollate

Non si ferma l’emergenza incendi in giro per il mondo. A Tenerife, una delle isole Canarie, il fuoco ha divorato 3mila ettari di bosco: 8mila persone sono state evacuate o hanno ricevuto l’ordine di non uscire di casa. «È il più grave degli ultimi 40 anni», ha detto il governatore Fernando Clavijo. Situazione fuori controllo anche in Canada, dove una città intera di 20mila abitanti, Yellowknife, è stata sgomberata prima che le fiamme arrivassero a lambire la periferia. Alle Hawaii, dove si contano più di 100 morti per gli incendi, ha dato le dimissioni Herman Andaya, il capo dell’Agenzia per la gestione delle emergenze di Maui, criticata per non aver suonato l’allarme mentre il fuoco devastava la città di Lahaina.