O Zinâ

Ediçion

E notiçie da-a Liguria

Senti a verscion registrâ:

O Toti o l’à dæto e dimiscioin, se torna à votâ in ötunno

O Giovanni Toti o l’à dæto e dimiscioin da prescidente da Region Liguria. A lettia offiçiâ a l’é stæta consegnâ a-a mattin di 26 de luggio da l’assessô Giacomo Giampedrone. Oua o zonta e o Conseggio arrestian in carrega pe l’amministraçion ordenäia fin a-e neuve eleçioin: l’é façile che o Governo o deçidde de mette insemme Emilia Romagna e Umbria inta mæxima dæta a-a meitæ de novembre. L’avvocato Stefano Savi o domandià a revoca di arresti in cà. Pe-o Toti, ascì in libertæ, porrieiva arrivâ o giudiçio spedio, con un proçesso ben ben ciù curto. «Me piggio a responsabilitæ de reciammâ i çittæn a-o voto – o l’à scrito o passou governatô inte unna lettia –. Lascio unna Region in ordine». L’oppoxiçion a se recilla: «Oua tocca à noiatri construe unn’alternativa». Anche o Renzi o corrià co-i progrescisti. Da-o çentro-drita ringraçiamenti e proteste: «E dimiscioin? Un fallimento da democraçia». O leghista Rixi o se tia feua: «No son mi o candidou giusto, serve un çivico».

Traduçion italiaña

Toti ha rassegnato le dimissioni, si torna a votare in autunno

Giovanni Toti si è dimesso da presidente della Regione Liguria. La lettera ufficiale è stata consegnata la mattina del 26 luglio dall’assessore Giacomo Giampedrone. Adesso la giunta e il Consiglio rimarranno in carica per l’ordinaria amministrazione fino alle nuove elezioni: probabile che il Governo decida di accorpare Emilia Romagna e Umbria nella stessa data a metà novembre. L’avvocato Stefano Savi chiederà la revoca degli arresti domiciliari. Per Toti, anche se in libertà, potrebbe arrivare il giudizio immediato, con un processo molto più breve. «Mi assumo la responsabilità di richiamare i cittadini al voto – scrive in una lettera l’ex governatore –. Lascio una Regione in ordine». L’opposizione gioisce: «Adesso tocca a noi costruire un’alternativa». Anche Renzi correrà con i progressisti. Dal centrodestra ringraziamenti e proteste: «Le dimissioni? Un fallimento della democrazia». Il deputato Rixi si chiama fuori: «Non sono il candidato giusto, serve un civico».

Frouxo in scî bonus edili, sexio un mion e mezo into Ponente ligure

A guardia di finansa de Saña a l’à descoverto un frouxo in scî bonus edili into Ponente ligure e a l’à sexio dinæ, inmòbili, oggetti de prexo e quöte de soçietæ pe unna varsciua de un mion e mezo d’euro. In prexon gh’é anæto un imprenditô, un geòmetra e un architetto ch’o louava anche à Zena. Da l’investigaçion da Procua de Saña l’é vegnuo feua l’emiscion de fattue pe operaçioin che no existeivan. Tutto l’é partio da-i espòsti de çerti privæ che mogognavan pe-i travaggi no finii inti tempi previsti ò ädreitua mai partii. O ciù de vòtte i loei no se favan, do tutto ò in parte, e e dite ean misse sciù solo pe creâ di crediti fäsci.

Traduçion italiaña

Frode sui bonus edilizi, sequestrato un milione e mezzo nel Ponente ligure

La guardia di finanza di Savona ha scoperto una frode sui bonus edilizi nel Ponente ligure e ha sequestrato denaro, immobili, oggetti di valore e quote societarie per un milione e mezzo di euro. In carcere sono finiti un imprenditore, un geometra e un architetto che lavorava anche a Genova. Dall’indagine della Procura di Savona è emersa l’emissione di fatture per operazioni inesistenti. Tutto è iniziato con gli esposti di alcuni privati ​​che lamentavano lavori non terminati in tempo o mai partiti. Nella maggior parte dei casi i lavori non venivano realizzati, del tutto o in parte, e le ditte venivano costituite solo per creare crediti falsi.

Machina into sciumme à Cichê, gravi unna madonnâ e i doî nevetti

Grave açidente into dòppodisnâ di 24 de luggio à Cichê, inte l’entrotæra do Tigullio. Unna machina con unna dònna e i doî nevetti adòsso a l’à desfondou a miagetta do ponte e a l’é finia inta giæa da Sturla. L’é arrivou ben ben de ambulanse ch’an soccorso a madonnâ e i doî figgeu, un masccio e unna femina, tutti portæ via in còdiçe rosso. A figgetta a l’ea quella ciù grave, portâ à l’uspiâ Gaslini de Zena con l’elicòttero di pompê, che dapeu son stæti apreuvo à tiâ feua a machina d’into sciumme. No l’é ancon ciæo se a dònna a l’agge perso o contròllo pe un patî ò pe unn’atra caxon.

Traduçion italiaña

Auto nel torrente a Cichero, gravi una nonna e i due nipotini

Grave incidente nel pomeriggio del 24 luglio a Cichero, nell’entroterra del Tigullio. Un’auto con a bordo una donna e i due nipotini ha sfondato il muretto del ponte ed è finita nel torrente Sturla. Sono arrivate diverse ambulanze che hanno soccorso la nonna e i due bambini, un maschio e una femmina, tutti trasportati in codice rosso. La bimba era quella più grave, portata all’ospedale Gaslini di Genova con l’elicottero dei vigili del fuoco, che poi si sono occupati di rimuovere l’auto dal fiume. Non è chiaro se la donna abbia perso il controllo per un malore o per un’altra causa.

E notiçie da l’Italia

Senti a verscion registrâ:

Napoli, deruo inte Vele de Scampia: trei mòrti e dozze ferii

Un ballou o l’é vegnuo zu inte uña de Vele de Scampia, à Napoli, a-i 22 de luggio. Træ persoñe son mòrte, un òmmo de 29 anni e doe dònne de 25 e 53 anni, tutti da mæxima famiggia. Atri 12 son arrestæ ferii, a meitæ son figgeu. Doe figgette de 7 e 4 anni son recoveræ in condiçioin graviscime à l’uspiâ Santobono con de frattue inta testa. Pöcassæ 800 rescidenti son stæti scorrii d’in cà, di quæ 300 minoî. A Procua a l’à averto unn’investigaçion pe deruo e ammassamento corpoxi. Un papê do 2016 o l’avvertiva za di reiseghi pe-e struttue e di destacchi de passee d’äsâ e ciumento armou pe-a «gramma manutençion anæta avanti inti anni». «Pe noiatri solo promisse, oua gh’é i mòrti», a raggia do quartê. Inta seiaña di 25 de luggio çentanæa de çittæn an defilou in corteo pe-e stradde co-e fraxelle e o striscion: «O nòstro sangue, e nòstre vitte. Rescistei».

Traduçion italiaña

Napoli, crollo nelle Vele di Scampia: tre morti e dodici feriti

Un ballatoio è crollato in una delle Vele di Scampia, a Napoli, il 22 luglio. Sono morte tre persone, un uomo di 29 anni e due donne di 25 e 53 anni, tutti appartenenti alla stessa famiglia. Altri 12 sono rimasti feriti, metà sono bambini. Due bambine di 7 e 4 anni sono state ricoverate in gravissime condizioni all’ospedale Santobono con fratture alla testa. Circa 800 residenti sono stati sfollati dalle loro case, di cui 300 minorenni. La Procura ha aperto un’indagine per crollo e omicidio colposo. Già un documento del 2016 metteva in guardia sui rischi strutturali e sui distacchi delle passerelle in acciaio e cemento armato dovuti alla “scarsa manutenzione protratta negli anni”. «Per noi solo promesse, ora ci sono i morti», la rabbia del quartiere. La sera del 25 luglio centinaia di cittadini hanno sfilato in corteo per le strade con le fiaccole e lo striscione: «Il nostro sangue, la nostra vita. Resistete».

Turin, giornalista aggredio da di militanti de CasaPound

Un giornalista de La Stampa, o Andrea Joly, o l’é stæto aggredio à Turin da di militanti de CasaPound pe aveili repiggiæ co-o telefonin tanto che festezzavan un anniversäio feua da-o club Asso di bastoni. Inte un video se vedde o Joly rebellou in tæra e piggiou à cäsci. Çinque presonti autoî da violensa son stæti identificæ. A prescidente do Conseggio Giorgia Meloni a l’à condannou o fæto: «L’attençion do Governo a l’é mascima», a l’à dito. Ma o prescidente do Senato Ignazio La Russa o l’à açeiso a polemica: «Nisciuña giustificaçion, ma l’aggredio o no s’é mai deciarou giornalista». Poule ciæe da-o prescidente da Repubrica Sergio Mattarella: «Ògni açion contra a libera informaçion a l’é unn’açion eversciva contra a Repubrica». In sce l’ipòtexi de desfâ CasaPound o ministro Antonio Tajani o l’à commentou: «Ghe veu unna sentensa da magistratua: se ghe fïse i estremmi no avieiva de problemi».

Traduçion italiaña

Torino, giornalista aggredito da militanti di CasaPound

Un giornalista de La Stampa, Andrea Joly, è stato aggredito a Torino da militanti di CasaPound per averli ripresi col cellulare mentre festeggiavano un compleanno fuori dal circolo Asso di Bastoni. In un video si vede Joly trascinato a terra e preso a calci. Identificati cinque presunti autori delle violenze. La presidente del Consiglio Giorgia Meloni ha condannato l’accaduto: «L’attenzione del Governo è massima», ha detto. Ma il presidente del Senato Ignazio La Russa ha acceso la polemica: «Nessuna giustificazione, ma l’aggressore non si è mai dichiarato giornalista». Parole chiare dal presidente della Repubblica Sergio Mattarella: «Ogni azione contro la libera informazione è un’azione eversiva contro la Repubblica». Sull’ipotesi di liquidazione di CasaPound il ministro Antonio Tajani ha commentato: «È necessaria una sentenza della magistratura: se ci fossero gli estremi non avrei problemi».

Mezogiorno in zenoggio pe-a seçia, a-o Nòrd gh’é tròppa ægua

L’Italia a l’é sciappâ inta doî. A-o Nòrd gh’é abbondansa d’ægua, con laghi e sciummi de portâ sorvia a media. O Mezogiorno, pe contra, o fa i conti co-a seçia: segondo l’Assoçiaçion di consòrçi de baçî da chì à træ settemañe no ghe saià ciù d’ægua pe-i campi. O ministro da Proteçion çivile Nello Musumeci o l’à attaccou e Regioin: «An speiso solo o 30% di dinæ missi à dispoxiçion da-o governo, inte l’insemme 1,2 miliardi. Primma de zugno do 2026 an da addeuviâli tutti, spero che saccian repiggiâ o tempo perso». L’emergensa ancheu a corpisce in particolâ Pulia, Abrusso e Siçilia donde e reserve son squæxi veue. O cado o bruxa ascì i tempi da vendegna, che in Siçilia a l’é za comensâ.

Traduçion italiaña

Mezzogiorno in ginocchio per la siccità, al Nord c’è troppa acqua

L’Italia è spaccata in due. Al Nord l’acqua è abbondante, con laghi e fiumi sopra le portate medie. Il Mezzogiorno, invece, fa i conti con la siccità: secondo l’Associazione dei Consorzi di Bacino tra tre settimane non ci sarà più acqua per i campi. Il ministro della Protezione civile Nello Musumeci ha attaccato le Regioni: «Hanno speso solo il 30% dei soldi messi a disposizione dal governo, per un totale di 1,2 miliardi. Entro giugno 2026 dovranno utilizzarli tutti, spero che sappiano recuperare il tempo perduto». L’emergenza oggi colpisce soprattutto Puglia, Abruzzo e Sicilia dove le riserve sono quasi esaurite. Il caldo brucia anche i tempi della vendemmia, che in Sicilia è già iniziata.

E notiçie da-o mondo

Senti a verscion registrâ:

Stati Unii, o Biden o se retia: a Kamala Harris a l’é a candidâ pe batte o Trump

O Joe Biden o s’é retiou da-a corsa pe-a prescidensa di Stati Unii. A-o seu pòsto a candidâ do Partio Democratico a saià a viçeprescidente Kamala Harris, çernua pe guägnâ contra o Donald Trump. «Ninte peu impedî de sarvâ a democraçia, compreiso l’ambiçion personale», o l’à dito o Biden inte un descorso a-a naçion. A Harris «a saià ancon ciù façile da batte», o commento do tycoon ch’o l’à definio lê «matta» e «incompetente» e o Biden «o pezo prescidente inta stöia do nòstro Paise». «L’ereditæ do Trump a l’é sensa pægi inta stöia moderna», a l’à deciarou incangio a neuva candidâ inta primma sciortia pubrica. I primmi sondaggi l’an dæta avanti inta regatta pe-a Casa Gianca. Intanto o prescidente isrælian Benyamin Netanyahu o l’à parlou a-o Congresso: «V’asseguo che guägniemo, emmo da stâ insemme pe fâ trionfâ e fòrse da çiviltæ». A Harris a l’à incontrou e a l’à dito: «Isræle a l’à o drito de defendise, ma comme o ô fa o l’é importante».

Traduçion italiaña

Stati Uniti, Biden si ritira: Kamala Harris è la candidata per battere Trump

Joe Biden si è ritirato dalla corsa alla presidenza degli Stati Uniti. Al suo posto la candidata del Partito Democratico sarà la vicepresidente Kamala Harris, scelta per vincere contro Donald Trump. «Niente può impedirci di salvare la democrazia, comprese le ambizioni personali», ha detto Biden in un discorso alla nazione. Harris «sarà ancora più facile da battere», commenta il tycoon che ha definito lei «pazza» e «incompetente» e Biden «il peggior presidente della storia del nostro Paese». «L’eredità di Trump non ha eguali nella storia moderna», ha invece dichiarato la nuova candidata nella prima uscita pubblica. I primi sondaggi la danno in vantaggio nella sfida per la Casa Bianca. Intanto il presidente israeliano Benyamin Netanyahu si è rivolto al Congresso: «Vi assicuro che vinceremo, dobbiamo restare uniti per far trionfare le forze della civiltà». Harris lo ha incontrato e ha detto: «Israele ha il diritto di difendersi, ma è importante il modo in cui lo fa».

Pariggi into ravaxo pe l’incomenso de Olimpiade: sabotaggio a-i treni

L’é comensou à Pariggi e Olimpiade con unna çeimònia d’avertua mai vista: i atleti e e delegaçioin son passæ co-e barche pe 6 chilòmetri in sciâ Senna a-a presensa di cappi de Stato. Ma in çittæ s’é visciuo da poia, co-i sordatti inte stradde, e di asciddi pesantiscimi pe-i traspòrti. Un grandiscimo attacco a-a ræ ferroviäia pe mezo d’inçendi a l’à guastou i treni à gran veloçitæ con bloccâ 800mia passaggê e fermâ o traffego con Londra. À Strasburgo l’é stæto desbarassou un airopòrto. Se sospetta un sabotaggio da parte de l’estremma scinistra, segondo i serviçi de seguessa, e in particolâ unna «contestaçion ecologista».

Traduçion italiaña

Parigi nel caos per l’inizio delle Olimpiadi: sabotaggio ai treni

Sono iniziate a Parigi le Olimpiadi con una cerimonia di apertura senza precedenti: atleti e delegazioni sono sfilati in barca per 6 chilometri sulla Senna alla presenza dei capi di Stato. Ma in città si sono vissuti paura, con i soldati nelle strade, e pesantissimi disagi ai trasporti. Un enorme attacco alla rete ferroviaria attraverso incendi ha interrotto i treni ad alta velocità lasciando bloccati 800 milioni di passeggeri e fermando il traffico con Londra. A Strasburgo è stato evacuato un aeroporto. Secondo i servizi di sicurezza si sospetta un sabotaggio da parte dell’estrema sinistra e in particolare una «contestazione ecologica».

Neuve moutie, in Braxî i primmi doî mòrti pe-a freve Oropouche

I primmi doî mòrti pe-a freve Oropouche son stæti registræ in Braxî, into Stato de Bahia, comme confermou da-o ministëio da Sanitæ. Un di paçienti o l’é un zoeno de 24 anni, mòrto à marso, e inti giorni passæ s’é azzonto unna dònna. Son e primme vittime inte tutto o mondo. Se parla de unn’infeçion caxonâ da un virus tropicale ch’o peu ëse afferrou da-i moscin e da-e çinsäe. I scintomi comprendan freve a-a cheita, mâ a-a testa, òsse reddene, doî e fastiddi. Ancheu no gh’é unna cua speçifica. À tutte e mainee, a poscibilitæ de mòrte a l’arresta ben ben ræa. Oropouche o l’é o nomme da region donde a moutia a l’é stæta descoverta e isoâ pe-a primma vòtta do 1955, inte un laboratöio de Trinidad e Tobago.

Traduçion italiaña

Nuove malattie, in Brasile i primi due morti per la febbre Oropouche

I primi due decessi per febbre di Oropouche sono stati registrati in Brasile, nello Stato di Bahia, come confermato dal ministero della Salute. Uno dei pazienti è un giovane di 24 anni, morto a marzo, e nei giorni scorsi si è aggiunta una donna. Sono le prime vittime a livello mondiale. Si tratta di un’infezione causata da un virus tropicale che può essere contratto da moscerini e zanzare. I sintomi includono febbre improvvisa, mal di testa, rigidità articolare, dolore e fastidio. Oggi non esiste una cura specifica. Tuttavia, la possibilità di morte rimane molto scarsa. Oropouche è il nome della regione in cui la malattia fu scoperta e isolata per la prima volta nel 1955, in un laboratorio a Trinidad e Tobago.