Lengua

O Zinâ o l’é scrito in zeneise çittadin, saieiva à dî a varietæ de ligure parlâ inta primma çittæ da region. A l’é a sola varietæ de ligure con unna produçion letteräia continua da-o secolo XIII fin a-a giornâ d’ancheu. Pe-o prestigio ch’o s’é guägno into corso di secoli, o zeneise o l’à de fæto, tra i parlæ da Liguria, a poxiçion de lengua letteräia e de parlâ commun.

E normative ortografiche preçise en quelle addeuviæ da-o Conseggio pe-o patrimonio linguistico ligure, stæte misse à ponto da un comitato de giornalisti, scrittoî e academichi pe-a pagina in zeneise do giornale Il Secolo XIX e pe atre iniçiative (Parlo Ciæo: la lingua della Liguria, à cua do A. Acquarone, 2015, De Ferrari, Zena).