O Zinâ

Ediçion

E notiçie da-a Liguria

Senti a verscion registrâ:

Festin à luxe rosse à Zena, sponta o nomme do viçeprescidente Piana. Lê: «Mai stæto lì»

Festin con dröga e prostitute pe ingraçiâse i personaggi ciù importanti da çittæ. L’é quello che l’é vegnuo feua da unn’investigaçion da Procua de Zena pe detençion e vendia de cocaiña e façilitaçion da prostituçion ch’a l’à portou à l’arresto de l’architetto Alessandro Cristilli e de l’abergatô Christian Rosolani. Inte l’ordinansa se leze ascì o nomme do viçeprescidente da Region Liguria Alessandro Piana, che inte unn’interçettaçion o l’é mensunou da-o Cristilli comme invitou à unna seiaña a-o 1º de marso do 2022 insemme a-o Pietro Biglia di Saronno, scrivan ben ben conosciuo à Zena e passou prescidente da Filse. «No son mai stæto à un festin, mai anæto con de prostitute e no ò mai piggiou de dröghe. Quella seia ea à cà mæ à travaggiâ», o l’à deciarou inte unna conferensa stampa o Piana, ch’o no l’é indagou ma o l’à domandou d’ëse sentio da-a Procua. O caxo o l’é finio de botto in conseggio regionale donde tutti an manifestou da solidarietæ a-o viçeprescidente levou o Ferruccio Sansa, ch’o n’aiva ciammou e dimiscioin con un scrito in sce Facebook donde se parlava de «bunga bunga». Da lì à pöco un atro caxo giudiçiäio o l’é scciuppou pròpio in sciô Sansa: seu moggê, l’avvocata Valeria Valerio, a l’é indagâ insemme con un fratte pe concorso in çirconvençion d’inabile e gh’é stæto sexio o conto in banca in commun co-o maio. «Me fio da magistratua – o l’à commentou o conseggê –. A costion a tocca o lou de mæ moggê e a no l’à da fâ co-o mæ ròllo instituçionale». A Lega però a no l’à mancou de besiggiâlo: «Se ti fïsci coerente con cöse ti dixi ti te doviësci dimette».

Traduçion italiaña

Festini a luci rosse a Genova, spunta il nome del vicepresidente Piana. Lui: «Mai stato lì»

Festini con droga e prostitute per ingraziarsi i personaggi più importanti della città. È quello che è emerso da un’inchiesta della Procura di Genova per detenzione e spaccio di cocaina e favoreggiamento della prostituzione che ha portato all’arresto dell’architetto Alessandro Cristilli e dell’albergatore Christian Rosolani. Nell’ordinanza si legge anche il nome del vicepresidente della Regione Liguria Alessandro Piana, che in un’intercettazione è menzionato da Cristilli come invitato a una serata il 1º marzo 2022 insieme a Pietro Biglia di Saronno, notaio molto conosciuto a Genova ed ex presidente di Filse. «Non sono mai stato a un festino, mai andato con prostitute e non ho mai assunto droghe. Quella sera ero a casa mia a lavorare», ha dichiarato in una conferenza stampa Piana, che non è indagato ma ha chiesto di essere sentito dalla Procura. Il caso è finito subito in consiglio regionale dove tutti hanno manifestato solidarietà al vicepresidente tranne Ferruccio Sansa, che ne aveva chiesto le dimissioni con un post su Facebook in cui si parlava di «bunga bunga». Poco dopo un altro caso giudiziario è scoppiato proprio su Sansa: sua moglie, l’avvocata Valeria Valerio, è indagata insieme a un frate per concorso in circonvenzione di incapace e le è stato sequestrato il conto bancario in comune col marito. «Mi fido della magistratura – ha commentato il consigliere –. La questione tocca il lavoro di mia moglie e non riguarda il mio ruolo istituzionale». La Lega però non ha mancato di pungerlo: «Se fossi coerente con ciò che dici ti dovresti dimettere».

Migranti, i scindichi do Gorfo de Dian scrivan a-o Piantedosi: «No a-o Cpr»

«No a-o Cpr pe-i migranti à Dian Castello, unna bomba pronta à scciuppâ». L’é quello che pensa i sette scindichi do Gorfo de Dian, inta provinsa d’Impëia, ch’an mandou unna lettia a-o ministro de l’Interno Matteo Piantedosi pe oppoñise a-a realizzaçion do çentro inta vegia caserma Camandone. «A struttua – se leze into papê – a l’é inte un scito de prexo, à pöca distansa da de importante struttue de reçevimento e de commerçio». L’anscietæ a l’é ligâ sorviatutto à l’economia turistica: «O danno – scrive i scindichi – o porrieiva ëse stramesuou in termini de produto interno regionale». Segondo o Cristiano Za Garibaldi, primmo çittæn de Dian, «s’é apreuvo à zugâ co-o feugo, sta chì a l’é unn’ipòtexi da matti». O Piantedosi, inta prefettua d’Impëia, o l’aiva taggiou feua l’idea de mette o Cpr à Ventemiggia, ascì che o scindico Flavio Di Muro o saieiva stæto d’accòrdio.

Traduçion italiaña

Migranti, i sindaci del Golfo Dianese scrivono a Piantedosi: «No al Cpr»

«No al Cpr per i migranti a Diano Castello, una bomba pronta a esplodere». È quello che pensano i sette sindaci del Golfo Dianese, in provincia di Imperia, che hanno inviato una lettera al ministro dell’Interno Matteo Piantedosi per opporsi alla realizzazione del centro nell’ex caserma Camandone. «La struttura – si legge nel documento – è in una località di pregio, a breve distanza da importanti strutture ricettive e commerciali». La preoccupazione è legata soprattutto all’economia turistica: «Il danno – scrivono i sindaci – potrebbe essere enorme in termini di prodotto interno regionale». Secondo Cristiano Za Garibaldi, primo cittadino di Diano, «si sta giocando col fuoco, questa è un’ipotesi folle». Piantedosi, nella prefettura di Imperia, aveva escluso l’idea di collocare il Cpr a Ventimiglia, anche se il sindaco Flavio Di Muro sarebbe stato d’accordo.

In Liguria mai coscì cado à ottobre inti urtimi vint’anni

I primmi dexe giorni d’ottobre do 2023 son stæti i ciù cadi in Liguria di urtimi vint’anni. À dîlo son i dæti de l’Arpal: a temperatua media da giornâ a l’é stæta de 19,2 graddi, a ciù erta de tutto o periodo, à peto de unna media climatològica de 15,7 graddi. O record avanti o l’é stæto marcou do 2009 e do 2004 con unna temperatua media de 17,4 graddi. Allargando a vista se peu dî ascì che inte l’erco ch’o va da-o 1º de zugno a-i 30 de settembre s’é registrou unna media de 21,7 graddi, pe unna stissa ciù bassa che i 21,8 do 2003. L’anomalia in relaçion a-i vint’anni a l’é de 1,2 graddi, un segnâ importante segondo i esperti. St’anno chì à Zena, con 37,9 graddi a-i 21 d’agosto, s’é toccou a temperatua ciù erta in çittæ fin da-o 1833. Oua però cangia tutto: da-a meitæ do meise arriva unna perturbaçion ch’a pòrta do tempo grammo e de l’äia ciù fresca. In sciâ fin, un assazzo d’ötunno.

Traduçion italiaña

In Liguria mai così caldo a ottobre negli ultimi vent’anni

I primi dieci giorni di ottobre del 2023 sono stati i più caldi in Liguria degli ultimi vent’anni. A dirlo sono i dati di Arpal: la temperatura media giornaliera è stata di 19,2 gradi, la più alta di tutto il periodo, rispetto a una media climatologica di 15,7 gradi. Il record precedente è stato segnato nel 2009 e nel 2004 con una temperatura media di 17,4 gradi. Allargando lo sguardo si può dire inoltre che nell’arco che va dal 1º giugno al 30 settembre si è registrata una media di 21,7 gradi, appena più bassa dei 21,8 del 2003. L’anomalia in relazione ai vent’anni è di 1,2 gradi, un segnale importante secondo gli esperti. Quest’anno a Genova, con 37,9 gradi il 21 agosto, si è toccata la temperatura più alta in città fin dal 1833. Ora però cambia tutto: dalla metà del mese arriva una perturbazione che porta maltempo e aria più fresca. Finalmente, un assaggio d’autunno.

E notiçie da l’Italia

Senti a verscion registrâ:

O gazzo o l’é torna à reisego, a Meloni a xeua in Africa

Torna l’allarme pe l’energia in Italia dòppo scciuppou a guæra in Isræle. A prescidente do Conseggio Giorgia Meloni a l’é anæta in vixita in Mozambico e Congo insemme à l’amministratô delegou de l’Eni Claudio Descalzi. A crixi partia da l’Ucraina a l’é ancon viva e i avvegnimenti into Levante de Mezo porrieivan pezoâ a scituaçion, visto che l’Algeria, co-a quæ l’Italia a l’à firmou di accòrdi pe-a fornitua de gazzo, a l’é da-a parte de Hamas. Coscì o governo o çerca d’arvî di neuvi canæ. Za inte sti giorni o prexo do gazzo in sciô mercou d’Amsterdam o l’é montou do 15%, arrivando à 53 euro a-o megawattoa, e anche l’Agençia internaçionale de l’energia a l’à avvertio da poscibile farta de gasòlio in Euröpa pe l’inverno che vëgne.

Traduçion italiaña

Il gas è di nuovo a rischio, Meloni vola in Africa

Torna l’allarme energia in Italia dopo lo scoppio della guerra in Israele. La presidente del Consiglio Giorgia Meloni è andata in visita Mozambico e Congo insieme all’amministratore delegato di Eni Claudio Descalzi. La crisi partita dall’Ucraina è ancora viva e le vicende in Medio Oriente potrebbero peggiorare la situazione, visto che l’Algeria, con cui l’Italia ha firmato accordi per la fornitura di gas, è schierata con Hamas. Così il governo cerca di aprire nuovi canali. Già in questi giorni il prezzo del gas sul mercato di Amsterdam è salito del 15%, arrivando a 53 euro al megawattora, e anche l’Agenzia internazionale dell’energia ha avvertito della possibile carenza di gasolio in Europa per il prossimo inverno.

O Cnel o bòccia o saläio minimo: «Megio a contrattaçion collettiva»

O Conseggio naçionale de l’economia e do travaggio o l’à affondou o saläio minimo. Into papê approvou à maggioransa – conträie Cgil, Uil e Usb – se sostëgne che sta mesua a no daieiva recatto ni a-o problema do travaggio pöveo ni a-a prattica do dumping di contræti, e se propoñe incangio de pontâ in sciâ contrattaçion collettiva. «Ciufito beseugna programmâ e mette in deuvia, inte un cian d’açion de ciù anni, di interventi organichi – a l’à dito a Meloni –. A l’é a stradda che o Governo o veu piggiâ ciù a-a spedia che se peu, tegnindo in mascimo conto e indicaçioin e i conseggi», anche quelli ch’arrivian da l’oppoxiçion. Unna tariffa minima de retribuçion inti settoî ciù critichi a l’ea stæta propòsta da çinque esperti, ma a l’é stæta refuâ. Pe-o prescidente do Movimento 5 Stelle Giuseppe Conte s’é compio «o delitto perfetto». O segretäio da Cgil Maurizio Landini o sponcia torna pe-o saläio minimo inte unna lezze in sciâ representansa: «No se peu ëse pagæ 5 ò 6 euro à l’oa, son de paghe da famme», o l’à attaccou.

Traduçion italiaña

Il Cnel boccia il salario minimo: «Meglio la contrattazione collettiva»

Il Consiglio nazionale dell’economia e del lavoro ha affondato il salario minimo. Nel documento approvato a maggioranza – contrarie Cgil, Uil e Usb – si sostiene che questa misura non risolverebbe né il problema del lavoro povero né la pratica del dumping contrattuale, e si propone invece di puntare sulla contrattazione collettiva. «Piuttosto bisogna programmare e realizzare, in un piano d’azione pluriennale, interventi organici – ha detto Meloni –. È la strada che il Governo vuole prendere nel minor tempo possibile, tenendo in massimo conto le indicazioni e i suggerimenti», anche quelli che arriveranno dall’opposizione. Una tariffa minima retributiva nei settori più critici era stata proposta da cinque esperti, ma è stata respinta. Per il presidente del Movimento 5 Stelle Giuseppe Conte si è compiuto «il delitto perfetto». Il segretario della Cgil Maurizio Landini spinge nuovamente per il salario minimo in una legge sulla rappresentanza: «Non si può essere pagati 5 o 6 euro l’ora, sono stipendi da fame», ha attaccato.

Zoeno de 23 anni o s’ammassa in sce TikTok, l’ombra do cyber-bulliximo

Un zoeno de 23 anni de Bològna o s’é ammassou tanto ch’o l’ea in diretta in sce TikTok, o social network donde ghe stava apreuvo 300mia persoñe. Inquisitor Ghost o l’ea o seu nommiagio, comme un di personaggi do videozeugo Call of Duty. Segondo çerte testimonianse o zoeno o saieiva stæto vittima de cyber-bulliximo: o l’avieiva conosciuo in sciâ Ræ unna figgia ch’a s’ea dita grande sciben ch’a l’aiva 17 anni, dapeu lê a l’avieiva spantegou in gio i messaggi tra de loiatri pe fâlo accaxonâ de pedofilia. «A giöxia de ste persoñe cattie a l’à ammassou mæ figgio», o l’à scrito seu poæ parlando de unna «stöia fäsa» ch’o l’avieiva portou à moî pe «protezise» da-a vergheugna. A Procua a l’à averto unn’investigaçion sensa indagæ e sensa ipòtexi de reato. In sciô caxo ghe travaggia i carabinê.

Traduçion italiaña

Ragazzo di 23 anni si uccide su TikTok, l’ombra del cyberbullismo

Un ragazzo di 23 anni di Bologna si è ucciso mentre era in diretta su TikTok, il social network dove era seguito da 300mila persone. Inquisitor Ghost era il suo nickname, come uno dei personaggi del videogioco Call of Duty. Secondo alcune testimonianze il giovane sarebbe stato vittima di cyberbullismo: avrebbe conosciuto online una ragazza che si era detta maggiorenne sebbene avesse 17 anni, poi lei avrebbe diffuso i messaggi tra loro per farlo accusare di pedofilia. «L’invidia di queste persone malvagie ha ucciso mio figlio», ha scritto suo padre parlando di una «storia falsa» che lo avrebbe portato a morire per «proteggersi» dalla vergogna. La Procura ha aperto un’inchiesta senza indagati e senza ipotesi di reato. Sul caso stanno lavorando i carabinieri.

E notiçie da-o mondo

Senti a verscion registrâ:

Hamas o l’attacca Isræle, scceuppa unn’atra guæra: i mòrti son za miggiæa

Isræle o l’é in guæra. A-i 7 d’ottobre Hamas o l’à comensou un attacco da-a Striscia de Gazza con un deruo de furgai e de incurscioin da tæra e da-o mâ. «L’inandiavimo da doî anni», o l’à dito un di cappi de l’organizzaçion palestineise. Corpio anche Tel Aviv e Gerusalemme. I mòrti e i ferii son za de miggiæa da tutte doe e parte. O primmo ministro Benjamin Netanyahu, sciben che accaxonou pe-o fallimento di serviçi de seguessa, o l’à reçevuo l’incarrego pe formâ un governo d’unitæ naçionale: «A saià unna guæra longa e dua – o l’à annonçiou – ma mettiemo sotta Hamas comme l’Isis». Dexeñe d’ostaggi son prexonê di miliçien islamisti. Isræle o l’à destaccou tutte e fornitue d’energia, ægua e mangiâ a-i palestineixi into territöio de Gazza. Di figgeu piccin son stæti ammassæ inti kibbutz: inte quello de Kfar Aza i sordatti isrælien an contou d’aveine trovou 40 sensa vitta, çerti co-a testa taggiâ. Gh’é di zoeni bruxæ vivi e intreghe famigge destrute à sangue freido. Intanto l’exerçito d’Isræle o l’à commandou l’evacuaçion de tutti i çivili da Gazza, un mion e passa de persoñe, in previxon de unn’offensciva totale contra Hamas. L’Onu a l’à domandou de tornâ inderê pe no avei de «conseguense umanitäie devastante». Inte tutto o mondo cresce l’attençion in scî poscibili obiettivi di terroristi. «Hamas o l’é o mâ sccetto», o l’à dito o prescidente american Joe Biden parlando a-e communitæ ebraiche e confermando l’arrembo à Isræle. A Ruscia, incangio, a s’é dita «mäveggiâ» pe l’attacco.

Traduçion italiaña

Hamas attacca Israele, scoppia un’altra guerra: i morti sono già migliaia

Israele è in guerra. Il 7 ottobre Hamas ha avviato un attacco dalla Striscia di Gaza con una pioggia di razzi e incursioni da terra e dal mare. «Lo preparavamo da due anni», ha detto uno dei capi dell’organizzazione palestinese. Colpite anche Tel Aviv e Gerusalemme. I morti e i feriti sono già migliaia da entrambe le parti. Il primo ministro Benjamin Netanyahu, benché accusato per il fallimento dei servizi di sicurezza, ha ricevuto il mandato per formare un governo di unità nazionale: «Sarà una guerra lunga e dura – ha annunciato – ma schiacceremo Hamas come l’Isis». Decine di ostaggi sono prigionieri dei miliziani islamisti. Israele ha staccato tutte le forniture di energia, acqua e cibo ai palestinesi nel territorio di Gaza. Bambini piccoli sono stati uccisi nei kibbutz: in quello di Kfar Aza i soldati israeliani hanno raccontato di averne trovato 40 senza vita, alcuni decapitati. Ci sono giovani bruciati vivi e intere famiglie distrutte a sangue freddo. Intanto l’esercito di Israele ha ordinato l’evacuazione di tutti i civili da Gaza, oltre un milione di persone, in previsione di un’offensiva totale contro Hamas. L’Onu ha chiesto di tornare indietro per non avere «conseguenze umanitarie devastanti». In tutto il mondo cresce l’attenzione sui possibili obiettivi dei terroristi. «Hamas è il male puro», ha detto il presidente americano Joe Biden parlando alle comunità ebraiche e confermando l’appoggio a Israele. La Russia, invece, si è detta «sorpresa» per l’attacco.

Ucraina, o Zelensky: «Me candido torna solo se va avanti a guæra»

O Volodymyr Zelensky, o prescidente de l’Ucraina, o l’é pronto à candidâse torna a-e eleçion ma solo se a guæra a l’anià avanti. Coscì o l’à dito inte unn’intervista à unna televixon da Romania: «Se a guæra a va avanti scì, se a guæra a finisce no. No pòsso scappâ into mezo da guæra», o l’à affermou. Intanto o Zelensky o l’à fæto unna vixita à sorpreisa into quartê generale da Nato à Bruxelles, reçevuo da-o segretäio Jens Stoltenberg. «Oua l’é importante che no ne lasciæ da soli», o l’à dito con domandâ di aggiutti pe un scistema de defeisa d’äia «pe scorrî i rusci da-o nòstro territöio». «Noiatri semmo da arente à l’Ucraina, a l’é importante pe tutta a Nato – o l’à respòsto o Stoltenberg –. A vòstra battaggia a l’é a nòstra ascì, v’aggiuttiemo pe fin che saià neçessäio».

Traduçion italiaña

Ucraina, Zelensky: «Mi ricandido solo se continua la guerra»

Volodymyr Zelensky, il presidente dell’Ucraina, è pronto a ricandidarsi alle elezioni ma solo se la guerra continuerà. Così ha detto in un’intervista a una televisione della Romania: «Se la guerra continua sì, se la guerra finisce no. Non posso scappare nel mezzo della guerra», ha affermato. Intanto Zelensky ha fatto una visita a sorpresa nel quartiere generale della Nato a Bruxelles, accolto dal segretario Jens Stoltenberg. «Ora è importante che non ci lasciate soli», ha detto chiedendo aiuti per un sistema di difesa aerea «per cacciare via i russi dal nostro territorio». «Noi siamo accanto all’Ucraina, è importante per tutta la Nato – ha risposto Stoltenberg –. La vostra battaglia è anche la nostra, vi aiuteremo finché sarà necessario».

Desinformaçion e terroriximo, a Commiscion europea a l’indaga in sce X

A Commiscion europea a l’à averto unn’investigaçion in sce X, coscì se ghe dixe a-o social network che unna vòtta o l’ea Twitter, pe di contegnui de desinformaçion, terroriximo, violensa e instigaçion à l’agrua vegnui feua dòppo l’attacco de Hamas contra Isræle. L’annonçio l’à dæto o commissäio pe-o Mercou interno, o Thierry Breton, apreuvo à unna lettia de reciammo mandâ a-o Elon Musk. Visto cha l’é uña de ciattaforme boñe à influensâ o mercou, «X a l’é tegnua à stâ apreuvo à tutte e dispoxiçioin do Digital Services Act – remarca a Commiscion europea – compreiso a valutaçion e mitigaçion di reiseghi ligæ a-a diffuxon de contegnui inlegali, desinformaçion, violensa de genere e quæsesegge effetto negativo in sce l’exerçiçio di driti fondamentali, di driti di figgeu, da seguessa pubrica e do benstâ da mente».

Traduçion italiaña

Disinformazione e terrorismo, la Commissione europea indaga su X

La Commissione europea ha aperto un’inchiesta su X, così si chiama il social network che una volta era Twitter, per contenuti di disinformazione, terrorismo, violenza e istigazione all’odio comparsi dopo l’attacco di Hamas contro Israele. L’annuncio l’ha dato il commissario per il Mercato interno, Thierry Breton, dopo una lettera di richiamo inviata a Elon Musk. Visto che è una delle piattaforme capaci di influenzare il mercato, «X è tenuta a seguire tutte le disposizioni del Digital Services Act – evidenzia la Commissione europea – inclusa la valutazione e mitigazione dei rischi legati alla diffusione di contenuti illegali, disinformazione, violenza di genere e qualsiasi effetto negativo sull’esercizio dei diritti fondamentali, dei diritti dei bambini, della sicurezza pubblica e del benessere mentale».