O Zinâ

Ediçion

E notiçie da-a Liguria

Senti a verscion registrâ:

O Toti a-i arresti anche pe finançiamento inleçito, inte 2mia in ciassa: «Dimiscioin»

Neuva mesua preventiva pe-o Giovanni Toti, za a-i arresti in cà da-i 7 de mazzo accaxonou de corruçion. Pe lê a Procua a l’ipotizza ascì o finançiamento inleçito perché o l’avieiva sfrütou da pubriçitæ «de badda» in sciô schermo in çimma a-o grattaçê de Primocanale, in veitæ pagâ da l’Esselunga comme vegnieiva feua da-e interçettaçioin. I fæti avieivan da fâ no solo co-e eleçioin pe-o Commun de Zena do 2022, ma ascì co-e politiche. Anche inte sto caxo a giudiçe Paola Faggioni a l’à valuou o reisego de commette torna o crimine. L’avvocato Stefano Savi o l’à annonçiou o recorso in Cassaçion pe tutte doe e mesue. Inti giorni che vëgnan o Toti o l’incontrià tra i atri o cappo da Lega Matteo Salvini. «Se cangia a linia politica o prescidente o porrià pensâ a-e dimiscioin», o l’à reportou l’assessô Giacomo Giampedrone dòppo aveighe parlou. À Zena pöcassæ 2mia persoñe in ciassa De Ferræ a-a manifestaçion de oppoxiçioin pe domandâghe de «liberâ a Liguria» e permette de neuve eleçioin. Intanto o Paolo Emilio Signorini o l’à lasciou a prexon de Marasci pe anâ a-i arresti in cà ospitou da seu figgia.

Traduçion italiaña

Toti agli arresti anche per finanziamento illecito, in 2mila in piazza: «Dimissioni»

Nuova misura cautelare per Giovanni Toti, già agli arresti domiciliari dal 7 maggio con l’accusa di corruzione. Per lui la Procura ipotizza anche finanziamenti illeciti perché avrebbe approfittato della pubblicità «gratuita» sullo schermo in vetta al grattacielo di Primocanale, in realtà pagata da Esselunga come emergerebbe dalle intercettazioni. I fatti non avrebbero a che fare solo con le elezioni per il Comune di Genova nel 2022, ma anche con le politiche. Anche in questo caso la giudice Paola Faggioni ha valutato il rischio di commettere nuovamente il reato. Per entrambi i provvedimenti l’avvocato Stefano Savi ha annunciato il ricorso in Cassazione. Nei prossimi giorni Toti incontrerà tra gli altri il leader della Lega Matteo Salvini. «Se dovesse cambiare la linea politica il presidente potrebbe valutare le dimissioni», ha riferito dopo l’assessore Giacomo Giampedrone dopo aver parlato con lui. A Genova circa 2mila persone si sono in piazza De Ferrari alla manifestazione dell’opposizione per chiedergli di «liberare la Liguria» e consentire nuove elezioni. Intanto Paolo Emilio Signorini ha lasciato il carcere di Marassi per andare agli arresti domiciliari ospitato dalla figlia.

Neuva diga, a Region a ferma o cian pe impî i cascioin de zetto

Torna un sappello in sciô cammin da neuva diga do pòrto de Zena. I scagni da Region Liguria an fermou o cian pe impî i cascioin co-o zetto di dragaggi ò di scavi pe-o tunnel sotta o pòrto. Segondo i tecnichi pe poei addeuviâ sto materiale – compreiso quello de demoliçioin – no bastieiva a Via regionale e ghe vorrieiva a Via naçionale, un fæto ch’o l’azzonzieiva di dubbi in scî tempi e i costi de un travaggio za ben ben compricou, dæto che pe-o momento no gh’é de soluçioin alternative. E ascì pe-o tunnel se dovieiva trovâ unn’atra mainea de levâ da mezo a tæra. Giusto a-a meitæ de luggio o consòrçio PerGenova Breakwater o l’aiva annonçiou a pösa do terso cascion a-o largo de San Pê d’Æña, co-a previxon de mettine zu 12 avanti da fin de l’anno e de finî a construçion pe-o novembre do 2026.

Traduçion italiaña

Nuova diga, la Regione ferma il piano per riempire i cassoni di detriti

Ancora un ostacolo sul cammino della nuova diga del porto di Genova. Gli uffici della Regione Liguria hanno fermato il progetto per riempire i cassoni col materiale di risulta dei dragaggi o gli scavi per il tunnel sotto il porto. Secondo i tecnici per poter utilizzare questo materiale – compreso quello delle demolizioni – non basterebbe la Via regionale e servirebbe la Via nazionale, circostanza che aggiungerebbe dubbi sui tempi e sui costi di un’opera già molto complicata, visto che al momento non esistono soluzioni alternative. E anche per il tunnel bisognerebbe trovare un altro modo per smaltire i detriti. Proprio a metà luglio il consorzio PerGenova Breakwater aveva annunciato la posa del terzo cassone al largo di Sampierdarena, con la previsione di calarne 12 entro la fine dell’anno e di terminare la costruzione a novembre 2026.

Un dron o cazze in sciâ gexa de Boccadase, o pilòtto o reisega 3mia euro de bolletta

Un dron o l’é preçipitou in sciâ gexa de Boccadase à Zena, a-i 18 de luggio, à pöchi metri da-e gente in sciâ mæña. O mezzo, de construçion artexanale, o l’é stæto repiggiou da-i pompê. O pilòtto o l’ea un turista polacco rescidente into Regno Unio. A-i cantonê o l’à exibio a seu attestaçion, ma o no l’à sacciuo fornî i papê de l’appægio e sorviatutto o no l’aiva d’asseguaçion. Oua o porrieiva reçeive unna bolletta da 30mia euro. O dron o l’é stæto sexio con tutti i seu componenti. L’é bon ch’o segge cheito pe un errô do pilòtto, ma l’é poscibile anche ch’o l’agge avuo un guasto.

Traduçion italiaña

Un drone cade sulla chiesa di Boccadasse, il pilota rischia 3mila euro di multa

Un drone è precipitato sulla chiesa di Boccadasse a Genova, il 18 luglio, a pochi metri dalle persone sulla spiaggia. Il velivolo, di costruzione artigianale, è stato recuperato dai vigili del fuoco. Il pilota era un turista polacco residente nel Regno Unito. Alla polizia locale ha esibito l’attestato, ma non ha saputo fornire i documenti dell’apparecchio e soprattutto non aveva l’assicurazione. Ora potrebbe ricevere una multa da 30mila euro. Il drone è stato sequestrato con tutte le sue componenti. Probabilmente si è schiantato a causa di un errore del pilota, ma è anche possibile che abbia avuto un malfunzionamento.

E notiçie da l’Italia

Senti a verscion registrâ:

Corruçion à Veneçia, indagou o scindico e arrestou un assessô

Unna neuva investigaçion pe corruçion a sciata a politica, stavòtta in sciô Commun de Veneçia. O scindico Luigi Brugnaro o l’é indagou e l’assessô Renato Boraso o l’é stæto arrestou. Tra i fæti contestæ gh’é a trattativa pe-a vendia de un scito in sciâ laguña, accattou da-o Brugnaro quande o no l’ea ancon in carrega, à l’imprenditô de Scingapore Chiat Kwong Ching, lê ascì indagou. O scindico o l’avieiva concordou un prexo de 150 mioin in cangio da promissa de rende l’area ciù boña da construe. «Ò sempre fæto i interesci da mæ çittæ», o l’à deciarou. Inte l’insemme 7 persoñe son finie a-i arresti in cà, 18 i indagæ. O Boraso, ch’o l’é anæto in prexon, o l’é accaxonou d’unze caxi differenti tra corruçion, concuscion e auto-reçiclaggio. Da-o Kwong Ching o l’avieiva incasciou 73mia euro e passa pe de consulense che no existeivan e o l’avieiva giou i dinæ à atre doe soçietæ de seu. Dòppo doî giorni da l’arresto o l’à dæto e dimiscioin.

Traduçion italiaña

Corruzione a Venezia, indagato il sindaco a arrestato un assessore

Una nuova indagine per corruzione sconvolge la politica, questa volta sul Comune di Venezia. Il sindaco Luigi Brugnaro è indagato e il consigliere Renato Boraso è stato arrestato. Tra i fatti contestati c’è la trattativa per la vendita di un’area sulla laguna, acquistata da Brugnaro quando non era ancora in carica, all’imprenditore di Singapore Chiat Kwong Ching, anche lui indagato. Il sindaco avrebbe concordato una cifra di 150 milioni in cambio della promessa di rendere l’area più edificabile. «Ho sempre fatto gli interessi della mia città», ha dichiarato. In totale sono finite agli arresti domiciliari 7 persone, 18 gli indagati. Boraso, finito in carcere, è accusato di undici diversi episodi tra corruzione, concussione e autoriciclaggio. Da Kwong Ching avrebbe incassato oltre 73mila euro per consulenze inesistenti e avrebbe girato i soldi ad altre due sue società. Due giorni dopo l’arresto si è dimesso.

Primmo scì a-o decreto «sarva-casa», un monolocale de 20 metri quaddri o saià abitabile

Da-a Camia l’é arrivou a primma luxe verde pe-o decreto «sarva-casa», comme ghe dixe o Governo. O provedimento o l’allarga i caxi d’abitabilitæ di inmòbili e o rende ciù façile mëgâ de inregolaritæ ediliçie e cangiâ a destinaçion d’uso. «Unna revoluçion liberale – commenta o ministro de Infrastruttue Matteo Salvini – ch’a veu desbroggiâ a vitta à mioin d’italien». Pe l’oppoxiçion, incangio, o l’é un «lerfon in sciâ faccia a-i tanti italien in difficortæ economica» e «un regallo a-i specolatoî» ch’o l’arve à unna legalizzaçion «sensa fren» di abuxi ediliçi. Tra e nòrme ciù contestæ gh’é quella ch’a permette l’abitabilitæ a-i monolocali de 20 metri quaddri (oua o limite o l’é 28), e unn’ertixe minima de 2,40 metri incangio de 2,70. Oua o decreto o passià a-o Senato pe l’approvaçion definitiva a-o ciù tardi a-i 28 de luggio pe-a converscion in lezze.

Traduçion italiaña

Primo sì al decreto «salva-casa», un monolocale di 20 metri quadrati sarà abitabile

Dalla Camera è arrivato il primo via libera al decreto “salvacasa”, come lo definisce il Governo. Il provvedimento amplia i casi di abitabilità degli immobili e facilita la sanatoria delle irregolarità abitative e il cambio di destinazione d’uso. «Una rivoluzione liberale – commenta il ministro delle Infrastrutture Matteo Salvini – che vuole semplificare la vita di milioni di italiani». Per l’opposizione, invece, si tratta di uno “schiaffo ai tanti italiani in difficoltà economica” e di “un regalo agli speculatori” che apre ad una legalizzazione “sfrenata” degli abusi edilizi. Tra le norme più contestate c’è quella che consente l’abitabilità a monolocali di 20 metri quadrati (ora il limite è 28) e un’altezza minima di 2,40 metri anziché 2,70. Ora il disegno di legge passerà al Senato per l’approvazione definitiva entro il 28 luglio per la conversione in legge.

Figgiña de un anno a meue de cado, o poæ o se l’aiva ascordâ in machina

Unna figgiña de un anno a l’é mòrta pe ëse arrestâ serrâ inte unna machina sotta o sô pe de oe. L’é capitou vexin à Veneçia a-i 18 de luggio. À ascordâse a picciña l’é stæto o poæ dòppo avei parchezzou da arente a-a dita dond’o travaggia. Chi l’à descoverta son stæti di colleghi à l’oa do disnâ: l’òmmo o l’à tòsto ciammou soccorso, ma no gh’é stæto ninte da fâ. L’ambulansa a l’é arrivâ da lì à pöchi menuti ma a foentiña a l’ea za stæta ammassâ da-o cado affogou. Oua l’òmmo o l’é indagou pe ammassamento corposo. Pe-i genitoî, destruti da-a tragedia e con unna figgia ciù grande, l’é stæto attivou l’ascistensa pscicològica.

Traduçion italiaña

Bimba di un anno muore di caldo, il padre l’aveva dimenticata in auto

Una bambina di un anno è morta dopo essere stata lasciata chiusa in macchina al sole per ore. È successo vicino a Venezia il 18 luglio. A dimenticare la piccola è stato il padre dopo aver parcheggiato nei pressi dell’azienda dove lavora. A scoprirlo sono stati dei colleghi all’ora di pranzo: l’uomo ha chiamato subito i soccorsi, ma non c’è stato niente da fare. L’ambulanza è arrivata in pochi minuti ma la bimba era già stata uccisa dal caldo soffocante. Ora l’uomo è indagato per omicidio colposo. Per i genitori, devastati dalla tragedia e con una figlia più grande, è stata attivata l’assistenza psicologica.

E notiçie da-o mondo

Senti a verscion registrâ:

Stati Unii, o Donald Trump ferio inte un attentato: «No m’arrendiò mai»

O Donald Trump, passou prescidente di Stati Unii e ancheu candidou di repubrichen, o l’é stæto ferio inte un attentato tanto ch’o tegniva un comiçio in Pennsylvania a-i 13 de luggio. Un zoeno de 20 anni, Thomas Crooks, registrou comme elettô repubrican, o gh’à tiou con un scceuppo d’in sce un teito e un proiettile o l’à corpio à unn’oegia. Un spettatô o l’é mòrto, atri doî son restæ gravemente ferii. L’attentatô o l’é stæto ammassou. «No gh’é pòsto pe-a violensa in America», o l’à dito o prescidente Joe Biden ch’o l’à ciammou l’avversäio a-o telefono. «O Segnô o m’à sarvou, no m’arrendiò mai», o l’à scrito o Trump o giorno apreuvo. Ma i serviçi de seguessa son inta boriaña. A-i 16 de luggio, vexin a-a convention repubricaña, a poliçia a l’à ammassou un òmmo armou de cotelli. A Cnn a l’à parlou de un complòtto de l’Iran pe ammassâ o Trump. Intanto o tycoon o l’à çernuo o seu candidou viçeprescidente: o James David Vance, 39 anni, senatô de l’Ohio. Sempre ciù fòrte e indiscreçioin in sciô retio do Biden, ma lê o l’assegua: «Torniò à fâ campagna» dòppo o Covid. Pe-i sondaggi o l’é destinou à perde ben ben.

Traduçion italiaña

Stati Uniti, Donald Trump ferito in un attentato: «Non mi arrenderò mai»

Donald Trump, ex presidente degli Stati Uniti e attuale candidato repubblicano, è rimasto ferito in un attentato mentre teneva un comizio in Pennsylvania il 13 luglio. Un ventenne, Thomas Crooks, registrato come elettore repubblicano, gli ha sparato con un fucile da un tetto e un proiettile lo ha colpito a un orecchio. Uno spettatore è morto, altri due sono rimasti gravemente feriti. L’attentatore è stato ucciso. «Non c’è posto per la violenza in America», ha detto il presidente Joe Biden, che ha chiamato al telefono l’avversario. «Dio mi ha salvato, non mi arrenderò mai», ha scritto Trump il giorno successivo. Ma i servizi di sicurezza sono nella bufera. Il 16 luglio, nei pressi della convention repubblicana, la polizia ha ucciso un uomo armato di coltelli. La Cnn ha parlato di un complotto iraniano per uccidere Trump. Intanto il tycoon ha scelto il suo candidato alla vicepresidenza: James David Vance, 39 anni, senatore dell’Ohio. Sempre più forti le indiscrezioni sul ritiro di Biden, ma lui assicura: «Tornerò a fare campagna elettorale» dopo il Covid. Secondo i sondaggi è destinato a perdere pesantemente.

Union Europea, a von der Leyen elezzua torna prescidente graçie a-i Verdi

Con 401 voti in favô, 284 conträi e 15 astegnui a Ursula von der Leyen a l’é stæta elezzua torna prescidente da Commiscion europea. I voti do Parlamento aivan da ëse a-o manco 360. Determinante o sostëgno di Verdi insemme a soçialisti e liberali, dòppo a conferma do green deal into programma de governo, sciben che inte tutti i gruppi gh’é stæto de defeçioin. À tutte e mainee l’é stæto piggiou de cianta l’obiettivo: fondâ l’incarrego in sce un «çentro democratico» tegnindo feua e fòrse estremme. «Serve unn’Euröpa fòrte, o destin o depende da noiatri», o messaggio into seu descorso. Oua se travaggia pe compoñe à squaddra di commissäi, con Fransa, Spagna e popolari comme ponti fermi.

Traduçion italiaña

Unione Europea, von der Leyen rieletta presidente grazie ai Verdi

Con 401 voti favorevoli, 284 contrari e 15 astenuti Ursula von der Leyen è stata rieletta presidente della Commissione europea. I voti del Parlamento dovevano essere almeno 360. Decisivo il sostegno dei Verdi insieme a socialisti e liberali, dopo la conferma del green deal nel programma di governo, anche se in tutti i gruppi ci sono state defezioni. In ogni caso l’obiettivo è stato pienamente centrato: basare il mandato su un “centro democratico” che escluda le forze estreme. «Abbiamo bisogno di un’Europa forte, il destino dipende da noi», il messaggio nel suo discorso. Adesso si lavora per comporre la squadra dei commissari, con Francia, Spagna e popolari come punti fermi.

Un guasto informatico o mette in crixi tutto o mondo: fermi xeui, treni e banche

Un guasto informatico o l’à mandou in crixi i scistemi de tutto o mondo inta giornâ di 19 de luggio. In scê primme s’é pensou à un attacco hacker, ma ben fito a raxon a l’é vegnua ciæa: tutta corpa de un problema inte l’aggiornamento do programma de seguessa Crowdstrike ch’o l’à bloccou Microsoft Windows in sce mioin de computer. Pe de oe s’é affermou airopòrti, ferrovie, banche, borse, fiña uspiæ e televixoin. Un miggiâ e passa i xeui scancellæ into mondo. L’açienda ch’a produxe o software a l’à distribuio unna correçion, dapeu l’amministratô delegou George Kurtz o s’é scusou inte un intervista. Ma i danni son stæti stramesuæ e ghe vorrià do tempo primma che seggian tutti arrangiæ. Pe tutti, intanto, s’é presentou torna o fantaxima de un squascio informatico globale ch’o mettieiva à reisego de fonçioin importantiscime pe-a vitta de persoñe.

Traduçion italiaña

Un guasto informatico mette in crisi tutto il mondo: fermi voli, treni e banche

Il 19 luglio un guasto informatico ha messo in crisi i sistemi di tutto il mondo. Inizialmente si pensava a un attacco hacker, ma ben presto il motivo è stato chiarito: tutta colpa di un problema nell’aggiornamento del programma di sicurezza Crowdstrike che ha bloccato Microsoft Windows su milioni di computer. Per ore sono stati colpiti aeroporti, ferrovie, banche, borse, perfino ospedali e televisioni. Un migliaio e oltre i voli cancellati in tutto il mondo. L’azienda che produce il software ha rilasciato una correzione, poi l’amministratore delegato George Kurtz si è scusato in un’intervista. Ma i danni sono stati enormi e ci vorrà tempo prima che siano tutti riparati. Per tutti, intanto, è ricomparso il fantasma di un collasso informatico globale che metterebbe a rischio funzioni importantissime per la vita delle persone.