O Zinâ

Ediçion

E notiçie da-a Liguria

Senti a verscion registrâ:

Violense dòppo o derby de Zena, 36 ferii e arresti. In campo guägna a Sandöia

Trentesëi persoñe ferie, a-o manco trei arresti, dexeñe de bacchi, trappe e cotelli sexii. L’é finio coscì o derby de Coppa Italia tra Zena e Sandöia, co-i scontri inte stradde tra i tifoxi, ch’an çercou d’intrâ in contatto tra de loiatri, e e fòrse de poliçia à mettise into mezo. In sciô campo o Döia o l’à guägno a-i penalti dòppo l’1-1 a-a fin di 90 menuti con ræ do Pinamonti e do Borini. Into segondo tempo l’é stæto espòsto in Gradinata Nord e bandee arröbæ inte l’allögio di Ultras Tito Cucchiaroni, un di episòddi a-a base da tenscion de sti meixi, e l’äia a s’é fæta ancon ciù pesante. De badaluffe gh’ean za stæte à Marasci primma da partia, ma inti urtimi menuti do derby l’é comensou a battaggia. De conseguensa a Prefettua a l’à deçiso de fâ zugâ Zena-Juventus à porte serræ e o mæximo provedimento o dovieiva arrivâ pe Sandöia-Juve Stabia. Condanna da-o ministro de l’Interno Matteo Piantedosi: «Fæti che no an ninte da fâ co-o ballon e no se peuan açettâ».

Traduçion italiaña

Violenze dopo il derby di Genova, 36 feriti e arresti. In campo vince la Sampdoria

Trentasei persone ferite, almeno tre arresti, decine di bastoni, aste e coltelli sequestrati. Si è concluso così il derby di Coppa Italia tra Genoa e Sampdoria, con scontri per strada tra tifosi, che cercavano di entrare in contatto tra loro, e le forze dell’ordine che si sono rapposte. In campo il Doria vince ai rigori dopo l’1-1 al termine dei 90 minuti con le reti di Pinamonti e Borini. Nel secondo tempo in Gradinata Nord sono state esposte le bandiere rubate nella sede degli Ultras Tito Cucchiaroni, uno degli episodi alla base della tensione di questi mesi, e l’aria si è fatta ancora più pesante. Tafferugli si erano già verificati a Marassi prima della partita, ma nei minuti finali del derby è iniziata la battaglia. Di conseguenza la Prefettura ha deciso di far giocare Genoa-Juventus a porte chiuse e lo stesso provvedimento dovrebbe arrivare per Sampdoria-Juve Stabia. Condanna del ministro dell’Interno Matteo Piantedosi: «Fatti che non c’entrano con il calcio e sono inaccettabili».

Corruçion, a-i 30 d’ottobre l’udiensa pe-o pattezzamento do Toti

A saià a-i 30 d’ottobre, giusto dòppo e eleçioin regionale in Liguria, l’udiensa pe-o pattezzamento do Giovanni Toti, do Aldo Spinelli e do Paolo Emilio Signorini, tutti finii drento à l’investigaçion pe corruçion averta da-a Procua de Zena. O passou governatô o l’aiva trovou l’accòrdio pe unna peña de doî anni e un meise convertia inte 1.500 oe de travaggi à vantaggio da soçietæ. O passou prescidente do pòrto Signorini, ch’o l’é tornou in libertæ dòppo quattro meixi e mezo, o l’aiva pattezzou trei anni e çinque meixi. Trei anni e doî meixi pe l’imprenditô Aldo Spinelli. E peñe però porrieivan montâ de quarche meise se o giudiçe o l’azzonzesse di atri episòddi de corruçion. À tutte e mainee o caxo giudiçiäio o no l’é ancon finio pe-i atri indagæ e e atre imputaçioin, tra e quæ o voto de scangio con l’aggravante mafiosa.

Traduçion italiaña

Corruzione, il 30 ottobre l’udienza per il patteggiamento di Toti

Si svolgerà il 30 ottobre, subito dopo le elezioni regionali in Liguria, l’udienza per il patteggiamento di Giovanni Toti, Aldo Spinelli e Paolo Emilio Signorini, tutti coinvolti nell’inchiesta per corruzione aperta dalla Procura di Genova. L’ex governatore aveva trovato l’accordo per una condanna a due anni e un mese convertita in 1.500 ore di lavori socialmente utili. L’ex presidente del porto Signorini, tornato in libertà dopo quattro mesi e mezzo, aveva patteggiato tre anni e cinque mesi. Tre anni e due mesi per l’imprenditore Aldo Spinelli. Le pene però potrebbero aumentare di qualche mese se il giudice aggiungesse altri episodi di corruzione. Tuttavia la vicenda giudiziaria non è ancora conclusa per i restanti indagati e per gli altri capi d’imputazione, tra cui il voto di scambio con aggravante mafiosa.

Ciavai, zoeno o rattella co-a madonnâ e o l’ammassa co-e tesoie

Un zoeno de 20 anni, Simone Monteverdi, o l’à ammassou a madonnâ Andreina Canepa d’82 anni con un pâ de tesoie. O l’é avvegnuo à Ciavai a-i 21 de settembre. I doî, ch’ean restæ à vive insemme da soli, avieivan rattellou e a dònna a saieiva stæta corpia a-a goa. L’é stæto pròpio seu nevo à ciammâ i carabinê e reportâ sti fæti: «A madonnâ a l’é mòrta, ma mi staggo ben», e seu primme poule. Ma da lì à pöchi giorni o Monteverdi o l’à denegou tutto e o l’à cangiou verscion areo: «No son stæto mi, no ea à casa», o l’à affermou inte l’interrogatöio de garançia. «Gh’é di desturbi de mente importanti da açertâ a-a spedia», a l’à commentou l’avvocata Ilaria Tulino con domandâ unna segonda vixita medica. Da neuve meixi o l’aiva ciantou d’anâ a-a scheua e o stava in letto pe tutto o giorno. Poliçia e carabinê l’aivan za vixitou pe di scciuppoin de raggia, ma nisciun l’avieiva mai imaginou unna tragedia pægia.

Traduçion italiaña

Chiavari, ragazzo litiga con la nonna e la uccide con le forbici

Un giovane di 20 anni, Simone Monteverdi, ha ucciso la nonna Andreina Canepa, 82enne, con un paio di forbici. È successo a Chiavari il 21 settembre. I due, che erano rimasti a convivere da soli, avrebbero litigato e la donna sarebbe stata colpita alla gola. È stato proprio il nipote a chiamare i carabinieri e a riportare questi fatti: «La nonna è morta, ma io sto bene», le sue prime parole. Ma pochi giorni dopo Monteverdi ha smentito tutto e ha cambiato completamente versione: «Non sono stato io, non ero in casa», ha affermato durante l’interrogatorio di garanzia. «Ci sono disturbi mentali importanti da accertare rapidamente», ha commentato l’avvocata Ilaria Tulino chiedendo una seconda visita medica. Da nove mese aveva smesso di andare a scuola e restava a letto tutto il giorno. Polizia e carabinieri lo avevano già visitato per alcuni scatti d’ira, ma nessuno avrebbe mai immaginato una simile tragedia.

E notiçie da l’Italia

Senti a verscion registrâ:

Inteisa pe-e nòmine da Rai, ma into campo largo no se va d’accòrdio

L’é arrivou l’accòrdio in scî amministratoî da Rai e intanto se rattella into campo largo progrescista. O Parlamento o l’à votou quattro conseggê, ma o Pd o no l’à parteçipou e o l’à attaccou Movimento 5 Stelle e Alleanza Verdi Sinistra. Mæximo pe-o referendum in sciâ çittadinansa promòsso da +Europa: e firme arrecugeite an passou e 500mia, ma o Giuseppe Conte o no l’à aderio e o va avanti co-a seu propòsta. «L’Italia a gh’à unna lezze boniscima, a no va cangiâ», a l’à dito a prescidente Giorgia Meloni. E intanto Italia Viva a l’é sciortia da-a coaliçion in Liguria. In ponto maneuvra o Governo o l’à confermou pe-o 2024 l’obiettivo de unna montâ do Pil de l’1% e de l’1,2% do 2025 e 2026. O Superbonus o pesià ancon in sciô debito, ch’o passià da-o 134,8% de st’anno a-o 138,3% do 2026.

Traduçion italiaña

Intesa per le nomine Rai, ma nel campo largo non si va d’accordo

Accordo raggiunto sugli amministratori della Rai e intanto si litiga nel campo largo progressista. Il Parlamento ha votato quattro consiglieri, ma il Pd non ha partecipato e ha attaccato Movimento 5 Stelle e Alleanza Verdi Sinistra. Stessi problemi per il referendum sulla cittadinanza promosso da +Europa: le firme raccolte hanno superato le 500mila, ma Giuseppe Conte non ha aderito e va avanti con la sua proposta. «L’Italia ha una legge molto buona, non cambierà», ha detto la presidente Giorgia Meloni. E intanto Italia Viva è uscita dalla coalizione in Liguria. In tema di manovra il Governo ha confermato per il 2024 l’obiettivo di un Pil in aumento dell’1% e dell’1,2% nel 2025 e nel 2026. Il Superbonus peserà ancora sul debito, che passerà dal 134,8% di quest’anno al 138,3% nel 2026.

Strage in famiggia in Sardegna, çinque mòrti e doî ferii

Strage in famiggia à Nuoro, in Sardegna, a-i 26 de settembre. Un òmmo de 52 anni, Roberto Gleboni, o l’à ammassou con unna pistòlla seu moggê Maria Giuseppina Massetti, doî di seu trei figgi (un de 10 e uña de 24 anni) e o vexin de cà, propietäio do scito, primma de giâ l’arma verso lê mæximo e levâse a vitta. O l’aiva sparou ascì à l’atro figgio de 14 anni e à seu moæ, arrestæ solo ferii. L’òmmo o louava comme scciappou e scindacalista da Cisl, a pistòlla a l’ea detegnua in regola. O movente o l’arresta un mistëio: pe-i vexin l’assascin o l’ea «paxe e corteise», a figgia Martina a gh’aiva fiña dedicou a laurea. «À cà stamattin sbraggiavan tutti», a testimoniansa do figgeu scampou a-o maxello. I inquirenti son apreuvo à scavâ into passou da famiggia.

Traduçion italiaña

Strage in famiglia in Sardegna, cinque morti e due feriti

Strage familiare a Nuoro, in Sardegna, il 26 settembre. Un uomo di 52 anni, Roberto Gleboni, ha ucciso a colpi di pistola la moglie Maria Giuseppina Massetti, due dei loro tre figli (uno di 10 anni e uno di 24 anni) e il vicino di casa, proprietario dell’appartamento, prima di rivolgere l’arma verso se stesso e togliersi la vita. Aveva sparato anche all’altro figlio di 14 anni e alla madre, rimasti solo feriti. L’uomo lavorava come operatore forestale e sindacalista per la Cisl, la pistola era regolarmente detenuta. Il movente resta un mistero: per i vicini l’assassino era «tranquillo e cortese», la figlia Martina gli ha persino dedicato la laurea. «Stamattina a casa tutti urlavano», ha testimoniato il ragazzo che è sopravvissuto alla carneficina. Gli investigatori stanno scavando nel passato della famiglia.

Premio Oscar, l’Italia a candidià Vermiglio da Maura Delpero

Vermiglio da Maura Delpero o l’é o cine che l’Italia a l’à candidou a-a seleçion do premio Oscar comme megio cine internaçionale. O l’é stæto çernuo tra 18 titoli tra i quæ Parthenope do Paolo Sorrentino, quello che se ghe dava ciù poscibilitæ. Vermiglio, ch’o l’à za guägno o Lion d’argento a-a Mostra do cine de Veneçia, o saià in zeugo pe-a lista curta ch’a comprendià i megio cini internaçionali seleçionæ da l’Academy e ch’a saià fæta conosce a-i 17 de dexembre. L’annonçio de nomination o l’é in programma pe-i 17 de zenâ do 2025, in sciâ fin a çeimònia di Oscar fissâ a-i 2 de marso.

Traduçion italiaña

Premio Oscar, l’Italia candiderà Vermiglio di Maura Delpero

Vermiglio di Maura Delpero è il film che l’Italia ha candidato alla nomination all’Oscar come miglior film internazionale. È stato scelto tra 18 titoli tra cui Parthenope di Paul Sorrentino, dato per favorito. Vermiglio, già vincitore del Leone d’Argento alla Mostra del Cinema di Venezia, sarà in lizza per la shortlist che comprenderà i migliori film internazionali selezionati dall’Accademia e che sarà resa nota il 17 dicembre. L’annuncio della nomination è previsto per il 17 gennaio 2025, mentre la cerimonia degli Oscar è fissata per il 2 marzo.

E notiçie da-o mondo

Senti a verscion registrâ:

Isræle o bombezza o Libano, o Netanyahu o refua o cian de paxe

S’allarga o conflitto into Levante de Mezo: o Libano o l’é introu in guæra e intanto Isræle o l’à refuou o cian de paxe propòsto da Stati Unii e Fransa. A capitale Beirut a l’é stæta bombezzâ. Son za çentanæa i mòrti çivili pe-i attacchi contra Hezbollah, 100mila e persoñe scorrie d’in cà. E gente scappan da-o sud do Paise, i uspiæ scceuppan, e scheue serræ vëgnan di campi pe-i pròfughi. O Netanyahu o no s’afferma: «Antiçipemmo a menassa». Hezbollah o l’à tiou un miscile in sce Tel Aviv: a defeisa isræliaña a l’à interçettou, ma a l’é a primma vòtta che i sciiti piggian l’asmia in sciâ çittæ. Pe-o Biden gh’é o reisego de «unna guæra in sce larga scâ». Ben ben di Paixi an dito a-i seu çittæn de lasciâ o Libano.

Traduçion italiaña

Israele bombarda il Libano, Netanyahu rifiuta il piano di pace

Si allarga il conflitto in Medio Oriente: il Libano è entrato in guerra e intanto Israele ha rifiutato il piano di pace proposto da Stati Uniti e Francia. La capitale Beirut è stata bombardata. Sono già centinaia i civili morti a causa degli attacchi contro Hezbollah, 100mila le persone sfollate dalle proprie case. La gente fugge dal sud del Paese, gli ospedali sono al collasso, le scuole chiuse diventano campi profughi. Netanyahu non si ferma: «Anticipiamo la minaccia». Hezbollah lancia un missile su Tel Aviv: la difesa israeliana lo ha intercettato, ma è la prima volta che gli sciiti prendono di mira la città. Per Biden c’è il rischio di “una guerra su larga scala”. Molti Paesi hanno detto ai propri cittadini di lasciare il Libano.

Ucraina, o Zelensky à l’Onu: «No açettiemo mai un accòrdio imposto»

«Voemo unna paxe giusta pe-o nòstro pòpolo, no açettiemo mai un accòrdio impòsto». Coscì o l’à dito o prescidente de l’Ucraina Volodymyr Zelensky à l’Assemblea generale de l’Onu, con remarcâ o reisego de un açidente nucleare inta çentrale de Zaporizhzhia inte moen di rusci. O ministro de l’Estranxeo de Mosca o l’avverte l’Occidente: «Perdiei». O Putin o menassa unna respòsta nucleare ascì into caxo de unn’aggrescion a-a Bieloruscia «co-o sostëgno de un Stato nucleare». Dapeu o Zelensky o l’à incontrou a viçeprescidente americaña Harris ch’a gh’à promisso atri 8 miliardi d’aggiutti e neuve arme à longo raggio. A candidâ democratica a l’à attaccou o Trump, ch’o no l’à vosciuo vedde o Zelensky: «O veu a reisa de Kiev».

Traduçion italiaña

Ucraina, Zelensky all’Onu: «Non accetteremo mai un accordo imposto»

«Vogliamo una pace giusta per il nostro popolo, non accetteremo mai un accordo imposto». Lo ha detto il presidente ucraino Volodymyr Zelensky all’Assemblea generale dell’Onu, rimarcando il rischio di un incidente nucleare nella centrale di Zaporizhzhia in mano ai russi. Il ministro degli Esteri di Mosca avverte l’Occidente: «Perderete». Putin minaccia una risposta nucleare anche in caso di aggressione alla Bielorussia «con il sostegno di uno Stato nucleare». Zelensky ha poi incontrato la vicepresidente americana Harris che gli ha promesso altri 8 miliardi in aiuti e nuove armi a lungo termine. La candidata democratica ha attaccato Trump, che non ha voluto vedere Zelensky: «Vuole la resa di Kiev».

L’oragan Helene o l’investe l’America, trei mòrti e un mion de gente sensa luxe

A-o manco træ persoñe son mòrte in sciâ còsta de Levante di Stati Unii pe l’oragan Helene ch’o l’à toccou tæra in Florida con fòrsa 4, saieiva à dî «assæ reisegoso». A tempesta, ch’a l’à corpio ascì Georgia, Alabama, Carolina e Virginia, a l’à caxonou de inondaçioin, i venti son arrivæ à 250 chilòmetri à l’oa, un mion de cæ e passa son arrestæ sensa luxe, inte çerti ponti l’é arrivou de onde de sëi metri. E autoritæ an fæto appello a-e gente de scappâ ò d’assostâse inte stançie ciù interne. «Piggiæ a cösa pe da bon e stæ à l’euggio», o l’à dito o prescidente Joe Biden. Helene a l’é l’ottava tempesta da saxon di oraghen atlantichi. Pe-a National Oceanic and Atmospheric Administration a corpa a l’é de temperatue do mâ ertiscime pe caxon do cangio do climma.

Traduçion italiaña

L’uragano Helene investe l’America, tre morti e un milione di persone senza luce

Almeno tre persone sono morte sulla costa orientale degli Stati Uniti per l’uragano Helene che è abbattuto sulla Florida con forza 4, che significa «molto pericoloso». La tempesta, che ha colpito anche Georgia, Alabama, Carolina e Virginia, ha causato allagamenti, i venti hanno raggiunto i 250 chilometri orari, oltre un milione di case sono rimaste senza elettricità, in alcuni punti sono arrivate onde di sei metri. Le autorità hanno lanciato un appello alle persone affinché evacuassero o si rifugiassero nelle stanze più interne. «Prendete la situazione sul serio e tenetela d’occhio», ha detto il presidente Joe Biden. Helene è l’ottava tempesta della stagione degli uragani nell’Atlantico. Per la National Oceanic and Atmospheric Administration la colpa è delle temperature marine estremamente elevate a causa dei cambiamenti climatici.