O Zinâ

Ediçion

E notiçie da-a Liguria

Senti a verscion registrâ:

Camallo mòrto into pòrto de Pra, s’indaga pe ammassamento corposo

Un camallo de 52 anni, o Giovanni Battista Macciò, o l’é mòrto inta neutte tra i 17 e i 18 de dexembre tanto ch’o travaggiava into pòrto de Pra. O l’ea apreuvo à controllâ i scigilli de un container inganciou à unna ralla quande o l’é stæto investio e ammassou da unn’atra ralla guiddâ da un collega, o Patrizio Randazzo. Un terso camallo o l’é arrestou ferio. A-a mattin apreuvo i scindacati an proclammou un sciòpero de 24 oe con di presciddi a-e intræ do pòrto. O Randazzo o l’é sciortio feua poxitivo a-i cannabinòidi, ma o no l’ea in condiçion d’alteraçion segondo i exammi. «M’é vegnuo un corpo de seunno dovuo a-a stanchessa, tròppo travaggio», o l’à dito à l’avvocato. O l’é indagou pe ammassamento corposo e o gh’à di antefæti penali, un pe violensa e un atro pe rescistensa.

Traduçion italiaña

Camallo morto nel porto di Pra’, si indaga per omicidio colposo

Un camallo di 52 anni, Giovanni Battista Maccio, è morto nella notte tra il 17 e il 18 dicembre mentre lavorava nel porto di Pra’. Stava controllando i sigilli di un container agganciato a una ralla quando è stato investito e ucciso da un’altra ralla guidata da un collega. Un terzo camallo è rimasto ferito. La mattina successiva i sindacati hanno proclamato uno sciopero di 24 ore con presidi ai varchi del porto. Il conducente della ralla che ha investito Macciò è risultato positivo ai cannabinoidi, ma dai test non è risultato alterato. «Mi è venuto un colpo di sonno per la stanchezza, troppo lavoro», ha raccontato all’avvocato. È indagato per omicidio colposo e ha precedenti penali, uno per violenza e un altro per resistenza.

O Toti o særa o pattezzamento, oua o l’ascistià i paçienti da Lilt

O giudiçe Matteo Buffoni do Tribunâ de Zena o l’à açettou o pattezzamento pe-o Giovanni Toti, passou prescidente da Region Liguria. A peña pe corruçion impròpia e finançiamento inleçito a l’é de doî anni e trei meixi, convertia inte 1.620 oe de travaggi à vantaggio da soçietæ ch’o faià pe-a Lilt (a lega pe-a lòtta contra i tumoî) con dâ a mente ascì à l’ascistensa a-i paçienti. Con lê an pattezzou ascì o Paolo Emilio Signorini, passou prescidente de l’Autoritæ portuale, e l’imprenditô Aldo Spinelli, che dovian domandâ a consegna in preuva a-i serviçi soçiali. Pe l’effetto da lezze Severino, o Toti o no porrià candidâse in Parlamento a-o manco pe sëi anni e pe-e carreghe amministrative o dovià domandâ a riabilitaçion dòppo ch’o l’avià scontou a peña.

Traduçion italiaña

Toti chiude il patteggiamento, ora assisterà i pazienti della Lilt

Il giudice Matteo Buffoni del Tribunale di Genova ha accettato il patteggiamento per Giovanni Toti, ex presidente della Regione Liguria. La pena per corruzione impropria e finanziamento illecita è di due anni e tre mesi, convertiti in 1.620 ore di lavori socialmente utili che farà per la Lilt (la lega per la lotta contro i tumori) occupandosi anche di assistere i pazienti. Con lui hanno patteggiato anche Paolo Emilio Signorini, ex presidente dell’Autorità portuale, e l’imprenditore Aldo Spinelli, che dovranno chiedere l’affidamento in prova ai servizi sociali. Per effetto della legge Severino, Toti non potrà candidarsi al Parlamento per almeno sei anni e per gli incarichi amministrativi dovrà presentare domanda di riabilitazione dopo aver scontato la pena.

Zena venduo à l’imprenditô romen Dan Şucu, primma vixita à Pegi

O Zena o l’é stæto venduo à l’imprenditô romen Dan Şucu. L’annonçio offiçiâ o l’é arrivou drito da-a soçietæ: o Şucu o l’à sottoscrito l’aumento de capitale da 40 mioin, piggiandose coscì o 77% de açioin. Za propietäio do Rapid Bucarest, o Șucu o l’é conosciuo comme o fondatô de Mobexpert, a ciù importante marca d’arredamento in Romania. «Veuggio inandiâ unna conlaboraçion tra o Zena e çerti club de l’Euröpa de l’Est – e seu primme deciaraçioin –. Vegnî açionista de referensa do Zena o l’é un önô e unna gran responsabilitæ». O giorno apreuvo o l’à vixitou a squaddra à Pegi. «O portià stabilitæ a-a soçietæ, o l’é ben ben poxitivo pe chi ghe travaggia e pe tutti i tifoxi», o l’à commentou l’allenatô Patrick Vieira.

Traduçion italiaña

Genoa venduto a l’imprenditore rumeno Dan Şucu, prima visita a Pegli

Il Genoa è stato venduto all’imprenditore rumeno Dan Şucu. L’annuncio ufficiale è arrivato direttamente dalla società: Şucu ha sottoscritto l’aumento di capitale di 40 milioni, rilevando così il 77% delle azioni. Già proprietario del Rapid Bucarest, Șucu è noto come fondatore di Mobexpert, il marchio di mobili leader in Romania. «Voglio avviare una partnership tra il Genoa e alcuni club dell’Est Europa – le sue prime dichiarazioni –. Diventare azionista di riferimento del Genoa è un onore e una grande responsabilità». Il giorno successivo ha visitato la squadra a Pegli. «Porterà stabilità alla società, è molto positivo per chi ci lavora e per tutti i tifosi», ha commentato l’allenatore Patrick Vieira.

E notiçie da l’Italia

Senti a verscion registrâ:

Erta tenscion in sciâ maneuvra, neuvo scontro in sciô Musk

Erta tenscion pe-a politica naçionale apreuvo a-a maneuvra ch’a reçevià l’urtima approvaçion a-o Senato dòppo Dëna co-o governo ch’o gh’à misso adòsso a confiansa, za votâ da-a Camia. Resta a polemica in scê indennitæ di ministri no elezzui: i stipendi no montian, ma ghe saià unna refæta de speise. Into serrâ Atreju, a festa de Fratelli d’Italia, a prescidente Meloni a l’à promisso: «I çentri pe-i migranti in Arbania fonçionian». Neuvo scontro in sciô Elon Musk, intervegnuo in sciô caxo Open Arms: «L’é asciurdo che o Salvini o segge proçessou pe avei defeiso o seu Paise», o l’à dito. O senatô à vitta Monti: «Coscì se perde a dignitæ». E a premier a l’à replicou: «Parlo con tutti ma no me fasso commandâ da nisciun».

Traduçion italiaña

Alta tensione sulla manovra, nuovo scontro su Musk

Alta tensione per la politica nazionale a causa della manovra che dopo Natale riceverà l’approvazione definitiva al Senato col governo che ha posto la fiducia, già votata dalla Camera. Resta la polemica sulle indennità dei ministri non eletti: gli stipendi non aumenteranno, ma ci sarà un rimborso delle spese. In chiusura di Atreju, la festa di Fratelli d’Italia, il presidente Meloni ha promesso: «I centri per migranti in Albania funzioneranno». Nuovo scontro su Elon Musk, intervenuto sul caso Open Arms: «È assurdo che Salvini venga processato per aver difeso il suo Paese». Il senatore a vita Monti: «Così si perde la dignità». E la premier ha ribattuto: «Parlo con tutti ma non mi faccio comandare da nessuno».

Stellantis verso l’accòrdio co-o governo, ma a crixi do gruppo a va avanti

O Gruppo Stellantis e o governo italian, dòppo e dimiscioin de l’amministratô delegou Tavares, van verso l’accòrdio in sciô cian presentou in sciâ töa do ministëio de Impreise. O programma o prevedde di investimenti pe 2 miliardi inte fabriche e atri 8 pe accattâ da fornitoî che travaggian in Italia da chì a-o 2032, modelli pe ciaschedun stabilimento pe-i eutto anni che vëgnan, tutto sensa aggiutti pubrichi a-a produçion. O cian «o dà satisfaçion a-e nostre domande», o l’à dito o ministro Urso. Intanto va avanti a crixi do gruppo: in Euröpa se registra un neuvo deruo de vendie.

Traduçion italiaña

Stellantis verso l’accordo col governo, ma la crisi del gruppo continua

Il Gruppo Stellantis e il governo italiano, dopo le dimissioni dell’amministratore delegato Tavares, si avviano verso il piano presentato al tavolo del ministero delle Imprese. Il programma prevede investimenti per 2 miliardi nelle fabbriche e altri 8 per acquistare dai fornitori che lavorano in Italia da qui al 2032, modelli per ogni stabilimento per i prossimi otto anni, il tutto senza aiuti pubblici alla produzione. Il piano «dà soddisfazione alle nostre richieste», ha detto il ministro Urso. Intanto la crisi del gruppo continua: in Europa si registra un nuovo crollo delle vendite.

Speleòloga serrâ inte unna barma, sarvâ dòppo 80 oe de travaggio

Gh’é vosciuo ottanta oe de travaggio sensa pösa di soccorritoî pe portâ à sarvamento a Ottavia Piana, a speleòloga de 32 anni arrestâ imprexonâ inta barma de Bueno Fonteno, inta Bergamasca, apreuvo à un deruo a-i 14 de dexembre. A dònna, unn’esperta do Cai ch’a l’ea lì in spediçion con atri neuve compagni pe fâ di studdi, a l’é cheita caxonandose de frattue. Pe tiâla feua an travaggiou 159 persoñe tra soccorso arpin e pompê. «A l’é stæta lê a fâne do cheu», an contou. Dapeu l’an portâ à l’uspiâ pe-o recòvero in terapia intensciva. «Maiciù inte unna barma», a l’aiva dito ancon primma de sciortîne. Do 2023 a l’ea arrestâ bloccâ into mæximo scito pe doî giorni con unna gamba rotta.

Traduçion italiaña

Speleologa intrappolata in una grotta, salvata dopo 80 ore di lavoro

Ci sono volute ottanta ore di incessante lavoro dei soccorritori per portare in salvo Ottavia Piana, la speleologa 32enne rimasta intrappolata nella grotta di Bueno Fonteno, nella Bergamasca, in seguito ad una frana lo scorso 14 dicembre. La donna, un’esperta del Cai che si trovava in spedizione con altri nove compagni per attività di studio, è caduta provocandosi fratture. Per tirarla fuori hanno lavorato 159 persone tra soccorso alpino e vigili del fuoco. «È stata lei a farci coraggio», hanno raccontato. È stata poi portata in ospedale per il ricovero in terapia intensiva. «Mai più in una grotta», aveva detto prima ancora di uscirne. Nel 2023 rimase bloccata nello stesso luogo per due giorni con una gamba rotta.

E notiçie da-o mondo

Senti a verscion registrâ:

L’Ucraina a l’ammassa un generale ruscio, avertue da tutte doe e parte

O generale ruscio Igor Kirillov, commandante de truppe de defeisa nucleare, chimica e biòlogica, o l’é stæto ammassou inte un attentato à Mosca. L’Ucraina a l’à revendicou l’attacco: «O l’ea un criminale de guæra e obiettivo legittimo». Mosca a l’à ciammou «un atto de terroriximo» e a l’à promisso «vendetta da chì à pöchiscimo». Intanto o prescidente Zelensky o l’à ammisso che l’Ucraina a no gh’à assæ de fòrse pe repiggiâse Donbass e Crimea con di mezzi militari e o conta in sciâ prescion da communitæ internaçionale. O Putin o l’à averto a-e negoçiaçioin con Kiev «ma solo co-e autoritæ legittime» e o l’à dito d’ëse pronto à incontrâ o Trump.

Traduçion italiaña

L’Ucraina uccide un generale russo, aperture da entrambe le parti

Il generale russo Igor Kirillov, comandante delle truppe di difesa nucleare, chimica e biologica, è stato ucciso in un attentato a Mosca. L’Ucraina ha rivendicato l’attacco: «Era un criminale di guerra e un obiettivo legittimo». Mosca lo ha definito «un atto di terrorismo» e ha promesso «vendetta imminente». Nel frattempo il presidente Zelensky ha ammesso che l’Ucraina non ha forze sufficienti per riconquistare il Donbass e la Crimea con mezzi militari e conta sulle pressioni della comunità internazionale. Putin si è detto aperto ai negoziati con Kiev “ma solo con le autorità legittime” e si è detto pronto a incontrare Trump.

Tregua à Gazza «mai stæta tanto vexiña». Parla o Assad dòppo a fuga da-a Sciria

Cresce a speransa pe un accòrdio in sciâ tregua à Gazza. Pe-i Stati Unii l’inteisa a no l’é mai stæta tanto vexiña, pe Hamas i incontri de Doha son «de sæximo e poxitivi». O fermæ o feugo, da quello che se dixe, o porrieiva partî da-i 25 de dexembre. Intanto, dòppo a cheita do seu regimme in Sciria e a fuga in Ruscia, parla torna o Bashar al Assad: «A mæ partensa a no l’ea programmâ e a no l’é intravegnua inte urtime oe da battagia. Mosca a l’à domandou unn’evacuaçion a-a spedia a-a seia di 8 de dexembre». A Sciria, o l’à azzonto, «a l’é inte moen di terroristi». E l’Union europea a l’à za annonçiou unna miscion diplomatica pe parlâ co-i neuvi governanti jihadisti.

Traduçion italiaña

Tregua a Gaza “mai così vicina”. Assad parla dopo la fuga dalla Siria

Cresce la speranza per un accordo sulla tregua a Gaza. Per gli Usa l’intesa non è mai stata così vicina, per Hamas gli incontri di Doha sono “seri e positivi”. Il cessate il fuoco, da quanto trapela, potrebbe partire dal 25 dicembre. Intanto, dopo il crollo del suo regime in Siria e la fuga in Russia, Bashar al Assad torna a parlare: «La mia partenza non era programmata e non è avvenuta nelle ultime ore della battaglia. Mosca ha chiesto una rapida evacuazione la sera del 8 dicembre». La Siria, ha aggiunto, «è nelle mani dei terroristi». E l’Unione Europea ha già annunciato una missione diplomatica per dialogare con i nuovi governanti jihadisti.

A Germania a score o cançellê Scholz, neuve eleçioin a-i 23 de frevâ

Crixi politica, e no solo econòmica, in Germania. O cançellê Olaf Scholz, a-a fin de unna discuscion dua comme tutto, o no l’à incasciou a confiansa da-o Bundestag: solo 207 voti à seu sostëgno, 394 contra e 116 astegnui. I todeschi tornian a-e eleçioin a-i 23 de frevâ, e tra l’atro sta chì a l’ea ascì l’intençion do seu partio. Pe-i sondaggi però i conservatoî son quelli ch’an ciù poscibilitæ de guägna: a Cdu a l’é dæta a-o 31%, l’Spd a-o 17%. O scontro o l’é stæto pròpio in scê politiche pe fâ repiggiâ l’economia: o Scholz o l’avieiva vosciuo fâ ciù debito pe sostegnî di investimenti pubrichi, pe-o cappo da Cdu Friedrich Merz i todeschi travaggian tròppo pöco.

Traduçion italiaña

La Germania sfiducia il cancelliere Scholz, nuove elezioni il 23 febbraio

Crisi politica, e non solo economica, in Germania. Il cancelliere Olaf Scholz, al termine di un dibattito durissimo, non ha ottenuto la fiducia del Bundestag: solo 207 voti favorevoli, 394 contrari e 116 astenuti. I tedeschi torneranno alle urne il 23 febbraio, e tra l’altro questo era anche l’obiettivo del suo partito. Secondo i sondaggi, però, i conservatori sono quelli con le maggiori possibilità di vittoria: la Cdu è data al 31%, l’Spd al 17%. Lo scontro è proprio sulle politiche di rilancio dell’economia: Scholz vorrebbe aumentare il debito per sostenere gli investimenti pubblici, per il leader della Cdu Friedrich Merz i tedeschi lavorano troppo poco.