Erboi, dòppo a tragedia o Commun de Zena o spende un mion pe fâ ciù taggi

O Commun de Zena o l’investe un mion d’euro pe fâ o doggio de contròlli e taggi di erboi in çittæ dòppo a cheita da parma in ciassa Poulo da Neuve ch’a l’à ammassou a Francesca Testino. L’Aster a prevedde de passâ da 200 à 400 abbattimenti inte un anno. Boriaña in sciâ lettia do viçescindico e candidou Pietro Piciocchi ch’o l’à ciammou perdon pe-a tragedia ma o l’à accaxonou ascì o «fanatiximo verde» pe-e deçixoin «inlògiche» ch’an portou à di gròsci reiseghi. I carabinê son intræ inti scagni do Commun, do Muniçipio Levante de Mezo e de l’Aster pe piggiâ tutti i papê boin pe l’investigaçion pe ammassamento corposo inandiâ da-a Procua. Intanto l’é stæto cacciou zu di pin in Castelletto, in Arbâ e in corso Monte Grappa.

Traduçion italiaña

Alberi, dopo la tragedia il Comune di Genova spende un milione per fare più tagli

Il Comune di Genova investe un milione di euro per raddoppiare i controlli e i tagli degli alberi in città dopo il crollo della palma in piazza Paolo da Novi che ha ucciso Francesca Testino. Aster prevede di effettuare da 200 a 400 abbattimenti in un anno. Bufera sulla lettera del vicesindaco e candidato Pietro Piciocchi che ha chiesto perdono per la tragedia ma ha anche accusato il «fanatismo verde» per le decisioni «illogiche» che hanno comportato gravi rischi. I carabinieri sono entrati negli uffici del Comune, del Municipio Medio Levante e di Aster per sequestrare tutta la documentazione utile all’inchiesta per omicidio colposo avviata dalla Procura. Nel frattempo sono stati abbattuti pini a Castelletto, Albaro e in corso sul Monte Grappa.

Eleçioin, scontro Bucci-Salis à l’airopòrto de Zena

Scontro tra a candidâ scindica do çentro-scinitra Silvia Salis e o prescidente da Liguria Marco Bucci à l’inauguraçion do neuvo settô de l’airopòrto de Zena. A Salis a l’é intervegnua tanto che o Bucci o parlava con di esponenti do Pd: «Sciâ l’ammie, prescidente, che se peu travaggiâ tanto ma fâ tante bellinate ascì». Dapeu a l’à serrou o descorso: «Se veddemmo à mazzo». Dapeu o Bucci o l’à accaxonâ: «A se n’é anæta, a l’é unna mainea d’ëse mäducæ». Lê a l’à replicou: «Mi no son scappâ, fòscia o no l’é avviou à unna dònna ch’a responde». O Piciocchi intanto o l’à presentou a candidatua in cobbia co-a Ilaria Cavo. O Filippo Biolé o s’é retiou da-a corsa pe de bæghe co-a seu lista, incangio o Mattia Crucioli e a Antonella Marras ghe preuvan unn’atra vòtta.

Traduçion italiaña

Elezioni, scontro Bucci-Salis all’aeroporto di Genova

Scontro tra la candidata sindaca di centro-sinistra Silvia Salis e il presidente della Regione Liguria Marco Bucci all’inaugurazione del nuovo settore dell’aeroporto di Genova. Salis è intervenuta mentre Bucci parlava agli esponenti del Pd: «Guardi, presidente, che si può lavorare tanto ma anche fare tante belinate». Poi ha concluso il discorso: «Ci vediamo a maggio». Bucci poi l’ha accusata: «Se n’è andata, è una forma di maleducazione». Lei ha replicato: «Non sono scappata, forse non è abituato a una donna che risponde». Piciocchi nel frattempo ha presentato la candidatura in coppia con Ilaria Cavo. Filippo Biolé si è ritirato dalla corsa a causa di dissidi con la sua squadra, mentre Mattia Crucioli e Antonella Marras ci riprovano.

Sanitæ, i carabinê denonçian di meghi in Liguria pe-e prescriçioin imbroggiæ

I carabinê an denonçiou quattro meghi de famiggia in Liguria pe avei fæto de prescriçioin d’exammi e vixite con de categorie de prioritæ fäse pe asseguâ a-i paçienti di tempi ciù curti. Un scistema che, segondo i militari, o saieiva «largamente in deuvia tra tutti i meghi da region». L’investigaçion a s’é conçentrâ mascime in scî exammi pe-i quæ gh’é ben ben da aspëtâ, comme e colonscopie e e resonanse magnetiche. Tanti meghi aivan l’andio de firmâ ciù prescriçioin à nomme do mæximo paçiente, into mæximo giorno e co-a mæxima domanda, pe dâ ciù poscibilitæ de trovâ un pòsto. Da-i contròlli l’é vegnuo feua che into 10-20% di caxi e prestaçioin no vëgnan dæte perché e gente no se presentan.

Traduçion italiaña

Sanità, i carabinieri denunciano medici in Liguria per ricette truccate

I carabinieri hanno denunciato quattro medici di medicina generale in Liguria per aver prescritto esami e visite con false categorie di priorità per garantire ai pazienti tempi più rapidi. Un sistema che, secondo i militari, sarebbe «ampiamente diffuso tra tutti i medici della regione». L’indagine si è concentrata in particolare sugli esami per i quali è prevista una lunga attesa, come la colonscopia e la risonanza magnetica. Molti medici avevano l’abitudine di firmare più ricette per conto dello stesso paziente, nello stesso giorno e con la stessa richiesta, per dare più possibilità di trovare un posto. Dalle verifiche è emerso che nel 10-20% dei casi le prestazioni non vengono erogate perché le persone non si presentano.